Gjurmë kokaine që ndotin lumenjtë dhe liqenet mund të depërtojnë në trurin e salmonit dhe të ndikojnë në sjelljen e tij, megjithëse pasojat e plota mbi peshqit ende nuk janë të qarta, paralajmërojnë studiuesit.
Shkencëtarë nga Universiteti Suedez i Shkencave Bujqësore kanë zbuluar se salmonët e ekspozuar ndaj kokainës dhe produktit të saj kryesor të shpërbërjes, benzoylecgonine, kanë notuar në distanca më të gjata dhe janë shpërndarë më shumë në liqen krahasuar me grupin e kontrollit që nuk ishte i ekspozuar ndaj këtyre substancave, raporton “The Guardian”.
Sipas studimit, salmonët janë lëshuar në liqenin Vättern në Suedi, ku janë ndjekur me transmetues akustikë. Rezultatet treguan se peshqit e ekspozuar ndryshuan modelet e tyre të lëvizjes dhe hynin më shpesh në zona të reja të liqenit. Ata gjithashtu rezultuan më aktivë, duke përshkuar deri në 14 kilometra më shumë se individët e paekspozuar.
Studiuesit theksojnë se ky ndryshim në sjellje mund të ndikojë drejtpërdrejt në ushqyerjen e tyre, shpenzimin e energjisë dhe ekspozimin ndaj grabitqarëve natyrorë.
Ekspertët paralajmërojnë se ndotja nga substancat farmaceutike dhe kimikatet e tjera paraqet një rrezik në rritje për biodiversitetin, duke shtuar se studime të mëparshme kanë treguar ndryshime të rëndësishme edhe në sjelljen e llojeve të tjera të peshqve të ekspozuar ndaj komponimeve të ngjashme.