Stacionari Llajka assesi të hapet, Shilegov paralajmëroi për në shtator, vullnetarët kërkojnë ndryshim të drejtoreshës

Edhe pas një vjet e gjysmë nga emërimi, u.d. drejtore e stacionarit për kafshë të pastreha “Llajka” nuk ka arritur të sterilizojë asnjë qen. Me akuza të tilla në opinion dolën shumë aktivist dhe shoqata për mbrojtjen e kafshëve. Sipas tyre, situata e tillë është rezultat i shkyçjes së tërësishme të aktivistëve nga të gjithë proceset që kanë të bëjnë me trajtimin e kafshëve të pastreha në qytetin e Shkupit. Ata pohojnë se udhëheqësja, Tina Petrushevska është e papërshtatshme dhe e keqpërdor funksionin e saj.

 “Problemin që e kemi në qytet, ne e identifikuam me emërimin e kuadrove të papërshtatshëm në funksione, konkretisht të u.d. drejtore e NP “Llajka”, për shkak se në vend që ajo të angazhohet ndërmarrja të fillojë sa më shpejtë me punë, ajo e keqpërdor detyrën e saj zyrtare dhe i përzë aktivistët, udhëheq procese gjyqësore kundër tyre, e pengon punën e tyre dhe në këtë tërheq institucione të tjera të shtetit, gjë për të cilën janë grumbulluar  shumë prova të cilat së shpejti do të dalin në opinion dhe do të procedohen përmes institucionet”, tha Dragana Vellkovska, Këshilltare në Qytetin e Shkupit.

Vellkovska tha se janë parashtruar kërkesa deri te Qyteti i Shkupit për trajtim të disperzuar të kafshëve endacake. TV21 e kontaktoi edhe drejtoreshën e NP “Llajka” e cila tha se deri më tani deri te ajo nuk ka arritur asnjë shkresë zyrtare me propozime për funksionimin e ndërmarrjes nga asnjë aktivistë, dashamirës i kafshëve apo shoqatë civile.

“Stacionari është ndërtuar në bazë të standardeve botërore dhe përfshinë pjesë karantine, ambulantë me pjesë për pranim, dy salla kirurgjike, kujdes intensiv, sektor për adoptim me sallë gruming, qendër për risocializim, qendër edukative, park për qentë, sektor për observim të qenve që kanë kafshuar qytetarë dhe pjesë e vogël administrative. Po shkojmë hap pas hapi më larg dhe e ngrisim nivelin e gjithë problematikës, kështu që së shpejti do t’ia kumtojmë opinionit rezultatet pas regjistrimit të qenve endacak në territorin e qytetit të Shkupit”, deklaroi Tina Petrushevska, Drejtore e NP “Llajka”.

I pyetur për atë se sa është i njoftuar dhe i kënaqur nga puna e drejtores, kryetari i Qytetit të Shkupit, Petre Shilegov, tha se kapaciteti është nga fundi dhe se së shpejti do të lëshohet në përdorim, kështu që nuk mund të flitet për cilësi reale në kryerjen e funksionit.

 “Sigurisht që puna e çdo udhëheqësi në cilindo institucion të qytetit është nën mbikëqyrje dhe sanksionohet. Me shumë gjasa jam një ndër të rrallët që shkarkon njerëz ose thërret në përgjegjësi”, theksoi Petre Shilegov, kryetar i Qytetit të Shkupit.

Aktivistët shkupjan për mbrojtjen e kafshëve, akuzojnë se tërësisht në mënyrë vullnetare ia kryejnë punën qytetit të Shkupit dhe nëse disponojnë me donacione të mjaftueshme, në nivel mujorë kanë kapacitet të sterilizojnë mbi 300 qenë dhe mbi 200 mace. Vetëm për momentin, aktivistët e Shkupit kanë përkujdesur mbi 500 kafshë endacake, ndërsa çdo muaj adaptojnë qindra. Ata në mënyrë unanime kërkojnë të ndryshohet drejtorja dhe të vendoset aktivist-vullnetarë shumëvjeçar në funksionin e drejtorit të NP “Llajka” që përfundimisht në mënyrë humane të zgjidhet çështja me kafshët endacake.