Kreu i Bashkimit Demokratik për Integrim, Ali Ahmeti, në një intervistë ndryshe në Televizionin 21, ka folur rreth ndryshimeve në Kodin Penal, por edhe ndryshimeve kushtetuese. Mes tjerash, Ahmeti thotë se në ndryshimet e Kodit Penal nuk ka asnjë marrëveshje VMRO-DPMNE-në, ndërsa gjithashtu nuk ka të bëjë fare me amnistimin e ndonjë zyrtari. Sipas tij, ndryshimet janë bërë për të patur një shtet funksional dhe gjyqësi funksionale.
“Kodi Penal nuk është shpallje e amnistisë. Amnistia ka karakter tjetër ndërsa kodi penal dhe ndryshimet që janë bërë, është tërësisht çështje tjetër. Kodin penal, të cilin ne e kemi të sanksionuar është fosile e mbetur nga regjimi jugosllav. Për të zgjatur hetime, për t’i mbajtur njerëzit në hetime për nga gjashtë vjet, tetë vjet. Dhe i gjithë kodi, ndryshimi që është bërë, është bërë për të patur një shtet funksional dhe një gjyqësi funksionale. Jo t’a mbashë njeriun gjashtë vite në hetime dhe tani ta lëshosh të pafajshëm”, tha Ali Ahmeti, kryetar i BDI-së.
Por pse ndryshimet u bënë ekspres për dy ditë? Sipas Ahmeti kjo nuk është e vërtetë. Siç zbulon ai, bisedimet kanë filluar që para tre viteve por atëkohë në moment të fundit ishte tërhequr ish kryeministri Zoran Zaev, ndërsa tani kur u arrit marrëveshja me LSDM-në, u tërhoq VMRO-ja. I pyetur nëse ndryshimet e kodit penal kanë të bëjnë për ndonjë marrëveshje me VMRO-në për ndryshimet kushtetuese, Ahmeti e mohon një gjë të tillë. Siguron që në momentin kur do të sigurohen 80 deputetët, do të thirret seanca. Datën nuk dëshiron ta zbulojë, por siguron se do të ndodhin gjatë muajit nëntor.
“Seanca e debatit për ndryshimet kushtetuese ka përfunduar. Do thirret seanca e radhës, nuk e publikoj. Nuk është për t’a ndarë me opinionin datën, por do thirret. Dhe në momentin që thirret seanca, do të bëhet votimi”, shtoi Ahmeti.
Sa i përket zgjedhjeve të ardhshme parlamentare, Ahmeti është i gatshëm që në zgjedhje të shkojnë me listë të përbashkët me të gjitha partitë shqiptare, pse jo edhe LSDM, mirëpo siç shton, kjo do të varet nga analiza që do të bëjë LSDM.