Nga sot e tutje, banorët e fshatit Siniçan të Komunës së Bogovinës, do të furnizohen me ujë të pijshëm nga çezmat e tyre. Kryetari i Komunës së Bogovinës, Albon Xhemaili, lëshoi zyrtarisht në përdorim ujësjellësin, pas mbi katër muaj protestë, revoltë dhe përplasje me autoritetet.
Xhemaili informoi mediat edhe për vendimin e gjykatës, sipas së cilit vendim, Xhemaili ka punuar konform rregullave.
“Muaj të tërë kemi bërë gjithë këto përpjekje, që sot lëshuam ujin e pijshëm në Siniçan. Mendoj se shumë dilema, diskutime dhe shumë polemika që u bënë rreth kësaj ngjarje u sqaruan edhe me vendimin e gjykatës se kryetari i komunës ka punuar në bazë të rregullave sepse bisedohej për një kohë pandemie ku nuk kishim kohë për ndalesë dhe duhej patjetër të veprojmë në terren”, deklaroi Albon Xhemaili – kryetar i Komunës së Bogovinës.
Pas disa dekadash pritje për ujë të pijshëm, më në fund u arrit qëllimi, deklaroi kryetari i Bashkësisë lokale të fshatit Siniçan, Bidajet Sulejmani.
“Sot e arritëm qëllimin tonë, e sollëm ujin për pije në fshatin Siniçan. Dhe si medium ju e keni parasysh se ne e kemi thënë nga bjeshka e Sharrit që vetëm më ujin për pije do të zbresim në fshat, dhe atë qëllim e arritëm. Fshati është i gëzuar për ujësjellësin që e kemi sjellë poshtë sepse me dekada kemi pritur ujë për pije”, tha Bidajet Sulejmani-kryetar i Bashkësisë Lokale Siniçan.
Banorët e Siniçanit, këtë ditë e konsideruan ditë feste. Ata u shprehën të lumtur që pas qëndrimit të gjatë në bjeshkë në shenjë proteste, sakrifica e tyre u shpërblye.
“Është ditë feste për ne këtu, është ditë gëzimi. Përfundimisht ne arritëm të sjellim ujë të pijshëm për vendbanimin tonë Siniçan. Rruga deri këtu nuk ishte e lehtë, ishte e vështirë. Unë shfrytëzoj rastin të falënderoj të gjithë ata që dhanë mundin e tyre, djersën e tyre dhe sakrifikuan për një kohë të gjatë e cila zgjati 4-5 muaj”, tha një banor.
“Fillimisht shumë rëndë, po në fund ia arritëm qëllimit, falë bashkëfshatarëve tanë, falë Komunës së Bogovinës, falë gazetarëve që keni bërë punë jashtëzakonisht të mirë, ju falënderoj shumë për përkrahjen, jemi mirënjohës për të gjithë”, tha një banor.
Ujësjellësi i ndërtuar ka një gjatësi prej 10 km, ka mbi 25 litra ujë në sekondë dhe do ua sigurojë ujin disa mijëra banorëve. Nga Komuna e Bogovinës gjithashtu njoftuan se po punojnë edhe për ndërtimin e ujësjellësave në vendbanime të tjera.