Ka mjaftueshëm para për ta mbingarkuar Ministrinë e Punëve të Brendshme, por policët i mban me rrogë nën minimalen e garantuar me ligj. Kjo ishte akuza e Sindikatës së Policëve në Maqedoni të cilët sot drejtuan akuza të drejtpërdrejta për Ministrin e Punëve të Brendshme Oliver Spasovski. Gjithashtu akuzojnë për numrin e vogël të policëve rajonal.
“Nuk ke mbajtur llogari se a ka mjaftueshëm punëtorë që ta mbulojnë të paktën pjesërisht territorin e rajoneve dhe sektorëve, por ke më shumë se mjaftueshëm sekretaresha, shërbëtore, bashkëpunëtorë të lartë, këshilltarë, ndihmës, zëvendës, ndihmës të zëvendësve.. E vetmja gjë që keni arritur të krijoni është policia e frikësuar e cila për 14.500 denarë e ulë kokën që mos të merr ndonjë nga vendimet e tua të jashtëligjshme dhe procedura disiplinore”, tha Orce Kocevski, kryetar i Sindikatës së Policëve në Maqedoni.
TV21 kërkoi qëndrim nga Ministria në fjalë për akuzat ndaj tyre. Nga atje hedhin poshtë pretendimet e Sindikatës duke theksuar se vazhdimisht bëhet plotësimi i stacioneve me policë të rinj, ndërsa theksojnë se që nga kthimi i tyre është shënuar rënie e krimit në vend.
“Në përputhje me strategjinë e Ministrisë së Punëve të Brendshme për plotësimin me policë të uniformuar, të gjitha stacionet policore nga juridiksioni i përgjithshëm gjatë viteve të fundit kanë marrë në vazhdimësi punonjës të rinj, me çka plotësohet mungesa e punonjësve të uniformuar që janë të nevojshëm që të funksionojë plotësisht metoda rajonale e punës dhe të sigurohet mbulimi i plotë i terrenit policor gjatë 24 orëve”, thonë nga Ministria e Punëve të Brendshme.
Ndërsa për pagat nga Ministria thonë:
“Sa i përket lartësisë së pagave gjatë periudhës që ministër është Oliver Spasovski, pagat janë rritur 3 herë, ndërsa gjithashtu ka filluar edhe pagesa e bonus pagave, gjë që nuk ka ndodhur më herët”, theksojnë Ministria e Punëve të Brendshme.
Ndryshe, policët rajonal apo “polici i lagjes” ka ekzistuar edhe më herët, ndërsa sindikalistet thonë se Spasovski e ka përvetësuar si projekt të vetin gjatë vitit 2018. Numri i nevojshëm i punonjësve të policisë për kryerjen e veprimtarisë policore si polic i lagjes, përcaktohet në bazë të madhësisë së sipërfaqes, numrit të popullsisë, numrit dhe rëndësisë së objekteve të rajonit të caktuar.