Si deri te gjyqësori i pavarur – ishte tema e debatit të sotëm i organizuar nga Instituti i demokracisë Societas Civilis, por edhe përkundër faktit që vite me radhë është parashtruar kjo pyetje në vendin tonë, gjendja jo vetëm që nuk ka përmirësim, por po keqësohet.
“Janë shumë më të theksuara ndikimet që gjykatësit i përjetojnë nga kolegët e tyre, nga eprorët e tyre, diku mbi 40% të gjykatësve denoncojnë se kanë pasur përvojë të tillë. Kështu që ai sistem i ndikimit është adaptuar që të duket pak më i fshehtë dhe unë e shoh atë strukturë të ndarë të kontrollit. D.m.th njëra palë siguron filtra, kush dhe ku do të gjendet e më pas sistemi kontrollon”, tha Misha Popoviq nga Instituti për Demokraci.
Deri më tani asnjë pushtet i vendit nuk ka arritur që të përmbahet nga ndikimi ndaj sistemit të gjyqësorit prej ku asnjëherë nuk e kuptuan se duhet të punojnë që të ketë drejtësi për qytetarët. Këtë e theksoi Uranija Pirovska, drejtore ekzekutive e Komitetit të Helsinkit për të drejtat e njerëzve, e cila tha se nuk sheh që kritikat e përfaqësuesve ndërkombëtarë do të kenë efekt.
“Çdo pushtet nuk i heq duart nga gjyqësori për shkak se gjyqësori është shumë mjet i fuqishëm për mbajtjen e pushtetit, për pagesën e borxheve ndaj partnerëve të koalicionit, për plotësimin e kërkesave të anëtarësisë partiake që çdoherë ka apetit të madh. Nuk mendoj se edhe faktori ndërkombëtarë mund të kryej ndikim, unë e kuptoj edhe revoltën e faktorit ndërkombëtarë, kam përvojë 27 vjeçare në sferën e drejtësisë dhe që sa e mbajë mend po investohet në edukimin e gjykatësve”, tha Pirovska.
Darko Avramovski, nga Koalicioni Të gjithë për drejtësi të drejtë, thotë se duhet të fillohet të mendohet në afat të gjatë se si të zgjidhen problemet në këtë sferë. Njëra nga mënyrat për të bërë këtë gjë është pastrim i gjyqësorit.
“Nevojitet që të bëhet hulumtim i mirë, planifikim i mirë, të hapen debate publike, të përfshihen të gjithë faktorët, të përfshihen edhe ata gjykatës që do ta kenë guximin që të kundërshtojnë korrupsionin dhe ndikimin. Por gjithsesi edhe të gjejmë mënyrë se si të izolojmë gjyqësorin nga ata karaktere të padëshiruara që nuk kanë integritet pa marrë parasysh a bëhet fjalë për gjykatës, prokurorë apo avokatë”, u shpreh Avramovski.
Këto ditë nga Stejt departamenti amerikan përsëri u dërgua porosi se liderët e partive politike në vend duhet të kufizojnë intervenimin politik në gjyqësorë.