U takuan por nuk arritën marrëveshje përfundimtare për ligjin për shtetësi. Kryeministri Zoran Zaev tha se në takimin me koordinatorët e grupit parlamentarë të ASH dhe AAA ishte konstruktiv dhe se janë marrë vesh për një pjesë të pikave, ndërsa për pjesën me të rëndësishme janë dakorduar që të dyja palët duhet të shqyrtojnë argumentet e njëra-tjetrës dhe më pas të takohen sërish brenda një jave.
“Ditëve në vazhdim shërbimet do të punojmë intensivisht që të shqyrtojnë dhe kuptojnë propozimet që i kanë dhënë dy partitë opozitare. Por pres që edhe ata t’i shqyrtojnë edhe argumentet që janë dhënë nga ministrat. Në këtë mënyrë do të konfirmojmë të gjithë se jemi për zgjidhje të përhershme, që qytetarët tanë që nuk kanë shtetësi të marrin e kjo të jetë në përputhje me konventën evropiane për shtetësi dhe Rregullativës ndërkombëtare për shtetësi”, tha Zoran Zaev.
Edhe koordinatori i grupit parlamentar të ASH-AAA, Skender Rexhepi vlerësoi se janë në rrugë të mirë për gjetjen e zgjidhjes për të gjithë ata qytetarë që janë pa shtetësi.
“Edhe ne si koalicion nuk jemi të interesuar që të jemi delja e zezë në kuadër të Kuvendit duke bllokuar sa e sa ligje vetëm për ta zhbllokuar ligjin për nënshtetësi, prandaj konsiderojmë se, pikat që diskutuam në takimin që sapo mbaroi janë të rëndësishme dhe do të duhet t’i diskutojmë të njëjtat edhe në kuadër të grupit bashkë me kryetarët e partie politike. Gjithsesi nga ana e Qeverisë kishte propozim për krijimin e një ligji me dispozitë kalimtare, të cilin ne do ta diskutojmë ndërsa, nga ana jonë jemi ata të cilët këmbëngulim që pavarësisht të gjitha rrethanave ne insistojmë që të ketë një zgjidhje ligjore”, tha Skender Rexhepi.
Ndërkohë deputeti i BDI-së Arbër Ademi, tha se që nga formimi i koalicionit mes BDI-së dhe LSDM-së, tema e shtetësisë ka marrë trajtimin e duhur institucional.
“Të paturit dokumente valide në Drejtorinë e librave amë ka qenë thelbi i bisedimeve në funksion të qenurit bazë për marrjen e shtetësisë. Këtë e kishim komunikuar disa herë në media dhe tashmë procesi ka filluar në bashkëpunim të drejtorisë së librave amë, ministrisë së Punëve të Brendshme dhe asaj të Drejtësisë”, tha Arbër Ademi.
Ai tha se gjatë viteve të pushtetit të BDI-së mbi 13 mijë shqiptarë kanë marrë shtetësinë dhe aktualisht në përpunim për marrjen e shtetësive janë 2 674 persona që kanë aplikuar për marrjen e shtetësisë.