Në fshatin Rashçe të komunës së Sarajit u promovua fillimi i punimeve për sistemin e ujësjellësit për fshatërat Rashçe, Kopanicë, Llaskarcë, Bojanë, Bukoviq, Çajlanë e Semenishtë. Ky projekt kapë vlerën prej 172 milion denarë, ndërsa i njëjti financohet nga Qyteti i Shkupit. Në fshatin Kopanicë do të ndërtohet gjithashtu rezervuar prej 600m3. Kryetari i komunës së Sarajit, premtoi se me këtë projekt, këto vendbanime do të kenë 24 orë ujë të pijshëm.
“Është projekt shumë i rëndësishëm që nuk do të ketë ndërprerje për vendbanimet. Do të ketë 24 orë ujë të pijshëm për vendbanimet Rashçe, Kopanicë, Bojanë, Llaskarcë dhe Bukoviq. Mbetet që komuna e Sarajit që t’i harton projektet të cilat janë në fazë përgatitore për vendbanimet Çajlanë dhe Semenishtë, ku rezervuari në Kopanicë ka kapacitetin që edhe këta vendbanime të furnizohen nga këta rezervuare që tani promovojmë.”- deklaroi Blerim Bexheti – Kryetar i Sarajit.
Kryetarja e Shkupit Danella Arsovska, tha se ky projekt ka qenë pjesë e programit zgjedhor të saj.
“Këto janë angazhime të përbashkëta të cilat së bashku me komunën e Sarajit arritëm që për ju si premtim prej para zgjedhjeve, ta realizojmë. Më vjenë mirë që së bashku me projektet tjera që i realizojmë për ju, kjo është një nga premtimet që aq shumë dekada u është premtuar, tani përfundimisht po realizohet.”- tha Danella Arsovska – Kryetare e Shkupit.
E kreu i Bashkimit Demokratik për Integrim e uroi kryetarin Bexheti për fillimin e rregullimit të ujësjellësit në këto vendbanime, por e kritikoi se këto çështje është dashur të rregullohen shumë më herët.
“I pashë dhe i numërova, shtatë vendbanime, nuk e di Blerim edhe sa kanë mbetur pa ujësjellës. Edhe një. Uroj që sa më shpejtë edhe atë ta mbuloni, sepse në shekullin 21 të flitet për ujësjellës dhe kanalizime, mendoj që nuk është mirë. Është dashur shumë më herët t’i përmbyllim këto vepra jetësore.”- pohoi Ali Ahmeti – Kryetar i BDI-së.
Sipas Arsovskës e Bexhetit, ky projekt pritet të përfundojë në fillim të vitit 2024.