Shkupi-Levski, ndeshja vazhdon në politikë! Osmani: Tifozët s’duhet të vendosen në kontekst të marrëdhënieve politike

Për marrëdhëniet ndërmjet grupeve etnike, dhe në këtë rast vendeve, nuk duhet të nxirren konkluzione përmes tifozëve. Ky është komenti i ministrit të Punëve të Jashtme, Bujar Osmani, pas incidenteve në ndeshjen Shkupi – Levski.

“Kjo është një botë e veçantë në të cilën tifozët kanë relacione të veçanta me njëri-tjetrin dhe ngjarje të tilla mes klubeve dhe tifozëve të çdo grupi nuk duhet të vendosen kurrë në kontekstin e marrëdhënieve politike, brenda apo mes vendeve”, tha Bujar Osmani, ministër i Jashtëm.

Osmani shton se më e rëndësishmja është që të mos ndërlidhen marrëdhëniet mes tifozëve dhe marrëdhëniet mes vendeve apo grupeve etnike.

“Partitë politike që përpiqen të marrin pikë politike në bazë të tensioneve mes tifozëve, më besoni se nuk nuk ja mendojnë të mirën as Bullgarinë, as Maqedoninë së Veriut, as për marrëdhëniet mes dy vendeve tona. Aq më pak në bazë të tensioneve mes tifozëve, të vlerësohet gatishmëria europiane e RMV-së. Mos,  gabimi i parë në çdo analizë është të bësh një korrelacion midis këtyre dy botëve krejtësisht të ndryshme”, deklaroi Bujar Osmani, ministër i Jashtëm.

Tema shkaktoi mosmarrëveshje edhe në Sofje. Zëvendësja e presidentit, Iliana Jotova shprehu keqardhjen e saj që ministria bullgare nuk mori masa të rrepta dhe as nuk u angazhua për trajtimin e tifozit të sulmuar.

“Është e paqartë për mua se pse Ministria jonë e Punëve të Jashtme nuk përgjigjet në asnjë formë dy ditë me radhë. Ka mënyra të ndryshme se si mund të bëhet kjo, të paktën mund t’i paraqiteni ambasadorit të Bullgarisë në RMV dhe ta dëgjoni informacionin nga afër, të dini se çfarë ka ndodhur, t’i dërgojë pyetjet tona udhëheqësisë së RMV-së, qeverisë, kryeministrit … Që të marrim përgjigje për të gjitha pyetjet që i bëjnë vetes qytetarët bullgarë”, theksoi Iliana Jotova, zëvendëse e presidentit të Bullgarisë.

Javën e ardhshme Shkupi zhvillon ndeshjen kthyese në Sofje, ndërsa bëhet e ditur se është ndaluar udhëtimi i tifozëve shkupjan.