Shënohet Dita e Alfabetit! Artan Grubi u drejtua me fjalët e Fishtës

Me këto do të shkruhet gjuha jonë, do të bëjmë shumë libra, do të mësojnë fëmijët të bëhen njerëz të ditur… e cmund të të shkruhet me këto shkronja.

Me këtë këngë përkushtuar 22 Nëntorit Ditës së Alfabetit u përmbyll manifestimi solemn i organizuar në Qeveri për ndër të shkronjave shqipe.

E fjalim solemn mbajti zv/kryeministri i parë Artan Grubi. Përmes një pjese të fjalimit të At Gjergj Fishtës, i cili ka qenë kryetar i komisionit për hartimin e alfabetit në Kongresin e Manastirit, Grubi tha se ky përvjetor i kushtohet Gjergj Fishtës duke lexuar një pjesë të fjalimit të tij.

 “Populli shqiptar flet nji gjuhë krejt të veten që, tuj lanë mënjanë transformimet e natyrshme të elementëve të cilëve nuk i ka pshtue asnji gjuhë tjetër deri më sot, kurrfare nuk mund të unjisohet me gjuhë të tjera keltike, latine, gjermanike, sllave ose helenike, me përjashtim ku puqet me to me rranjë të bashkueme indo-gjermane. Prej këtej pra rrjedh që të gjithë ata që e flasin këtë gjuhë, kanë një kombësi krejt më vete e krejt të ndame prej asaj të kombeve të tjera të Europës”, tha Artan Grubi – zëvendëskryeministër i parë.

Ndërkohë në Kuvend, çmimi Shtetëror “22 Nëntori” iu nda akademikut Ali Aliu dhe profesor Xhevat Lloshit nga Shqipëria.

“Unë mendoj që çmimi që jepet tash tregon për një frymë të re në marrëdhëniet në mes popujve. Është një çmim i cili lidhet me historinë dhe kulturën shqiptare por unë mendoj se ka vend edhe në historinë e Maqedonisë së Veriut, e pasuron atë”, u shpreh Xhevat Lloshi – profesor nga Shqipëria.

Edhe opozita shqiptare uroi festën e Alfabetit, por kritikon se gjuha shqipe ende nuk trajtohet ashtu siç e meriton.

 “Është për të ardhur keq që edhe pas shumë përpjekjesh e sakrificash në këtë vend, gjuhës tonë Kushtetua e shtetit i referohet si gjuha e 20 % të popullatës. Është e trishtueshme kur shumë titullarë institucionesh qofshin edhe ata shqiptarë, nuk e përfillin gjuhën shqipe. Për këto shkelës ne së bashku krijuam edhe inspektoratin i cili do të dënonte refuzimin e injorimin e gjuhës shqipe, por fatkeqësisht ky institucion udhëhiqet nga një kuadër i një partie politike e cila për dy dekada një gjë premton e një gjë tjetër bën”, theksoi Bujare Abazi nga Aleanca për Shqiptarët.

Edhe Instituti për Trashëgimi Shpirtërore dhe Kulturore të Shqiptarëve  në kuadër të manifestimit për  22 Nëntorin, promovoi  librin “Ditari i Parashqevi Qiriazit” nga Skender Asani dhe Nora Maliqi-Zulali Urime për ditën e alfabetit shqip adresuan edhe krerët shtetërorë, presidenti i shhtetit, kryetari i Kuvendi, kryeministri dhe liderët e partive politike.