Shënohet 112-vjetori i Kongresit të Manastirit! Xhaferi: Të angazhohemi për përdorimin korrekt të shqipes

Nesër shënohet Dita e Alfabetit të Gjuhës Shqipe e ndërsa sot Instituti për Trashëgimi Shpirtërore e Kulturore të Shqiptarëve organizoi një akademi shkencore e quajtur “Dita e Alfabetit”. Drejtori i Institutit, Skender Asani, tha se ndjehet i nderuar për organizimin e kësaj ngjarjeje dhe foli për rëndësinë e kësaj date historike për të gjithë shqiptarët.

 “Ky Kongres është faqja tjetër e Lidhjes Shqiptare të Prizrenit dhe sintetizim më i saktë i përpjekjeve iluministe të rilindësve tanë për ndriçimin e kombit. Shqipëria e ka Vlorën e pavarësisë, Kosova e ka Prizrenin e Lidhjes, ndërsa shqiptarët e Maqedonisë së Veriut e kanë Kongresin e Manastirit”, tha Skender Asani – Drejtor i ITSHKSH.

Në manifestim mori pjesë edhe kryeparlamentari Talat Xhaferi, i cili  uroi Festën e Alfabetit të Gjuhës Shqipe, dhe  theksoi nevojën që në të gjitha institucionet të shtohet vëmendja dhe vetëdija ndaj përdorimit korrekt të gjuhës standarde shqipe.

“Duhet të jemi vigjilentë, secili në pjesën e vet të fushëveprimit. Këtu së pari kam ndërmend veten dhe përfaqësuesit e diapazonit politik që aktualisht jemi ose do të bëhemi në të ardhmen pjesë e pushtetit legjislativ dhe që mund të ndryshojmë, plotësojmë, përmirësojmë mbështetjen ligjore për ruajtjen e gjuhës standarde”, deklaroi Talat Xhaferi – Kryetar i Kuvendit të Maqedonisë së Veriut.

Ylber Sela, drejtor i Agjencisë për Zbatimin e Gjuhëve, tha se ka fatin ta drejtojë këtë agjenci, e cila çdo ditë e më tepër jep ndihmesën e vet në zbatimin zyrtar të kësaj gjuhe.

 “Kongresi i Alfabetit është vetvetiu një simbolikë e veçantë, për arsye se që nga ajo ditë kur mbizotëroi fryma e unitetit shqiptar, u bë udhërrëfyes edhe për shumë beteja të tjera, të mëvonshme, duke shërbyer si shembull pozitiv se si mund të bëhen shumë gjëra të mëdha me anë të mirëkuptimit dhe bashkimit”, theksoi Ylber Sela – Drejtor i Agjencisë për Zbatimin e Ligjit për përdorimin e gjuhëve.

Në manifestim mori pjesë edhe zëvendësministri i Arsimit dhe Shkencës Arafat Shabani dhe drejtori i Arkivit Qendror të Shtetit Shqiptar Ardit Bido, ndërsa në ditën e nesërme aktivitetet e manifestimit kulturor – shkencor “Ditët e Alfabetit”, kulmojnë me përkujtimin e Zonjës së Parë të Alfabetit – Parashqevi Qiriazi. Me atë rast, do të promovohet libri me dokumente “Ditari i Parashqevi Qiriazi”, si dhe filmi dokumentar për në UNESCO.