Sekretari amerikan i Shtetit, Marco Rubio, ka zhvilluar bisedime me presidentin e Libanit, Joseph Aoun, dhe kryeministrin izraelit, Benjamin Netanyahu, lidhur me negociatat diplomatike mes Izraelit dhe Libanit, duke propozuar një plan për “deeskalim gradual” të konfliktit, shkruan Reuters.
Një zyrtar amerikan, që kërkoi të mbetet anonim, deklaroi se propozimi i SHBA-së parashikon si hap të parë ndërprerjen e të gjitha sulmeve të lëvizjes pro-iraniane Hezbollah ndaj Izraelit, ndërsa në këmbim forcat izraelite do të përmbaheshin nga përshkallëzimi i mëtejshëm i operacioneve ushtarake në Bejrut.
“Kjo do të krijonte hapësirë për një deeskalim gradual dhe një ndërprerje efektive të armiqësive”, tha zyrtari amerikan.
Ai shtoi se Aoun është përpjekur të avancojë propozimin dhe të sigurojë një marrëveshje mes palëve, por kryetari i Parlamentit libanez, Nabih Berri, i cili pretendon se garanton angazhimin e Hezbollahut ndaj armëpushimit, beson se Izraeli duhet të ndalë i pari sulmet.
Netanyahu deklaroi dje se kishte urdhëruar forcat izraelite të depërtonin më thellë në territorin libanez në operacionet kundër Hezbollahut, pavarësisht armëpushimit të shpallur më shumë se gjashtë javë më parë.
Ushtria izraelite njoftoi se në ofensivën më të fundit ka marrë nën kontroll kështjellën 900-vjeçare Beaufort dhe një pozicion strategjik të rëndësishëm në jug të Libanit. Operacioni pasoi një ditë pas sulmeve më intensive me raketa nga Hezbollah ndaj veriut të Izraelit që nga armëpushimi i prillit, duke detyruar mbylljen e shkollave dhe vendosjen e kufizimeve në zonat e prekura.
Zyrtari amerikan theksoi se Uashingtoni nuk pret që Izraeli të vazhdojë të tolerojë sulmet e Hezbollahut ndaj popullsisë civile pa reaguar.