Sërish në rritje numri i të infektuarve me Covid-19!

Për 56% është rritur numri i të infektuarve të ri me koronavirus. Mosha më e prekur është ajo 60 vjeçare, ndërsa numri më i madh i rasteve është regjistruar në kryeqytet, thotë raporti javor i Institutit për Shëndet Publik. Shaban Memeti, anëtarë në Komisionin për Sëmundje Infektive, thotë se kjo është valë tjetër e re e rritjes së koronaviursit, ndërsa shkaku për këtë është mosrespektimi i masave ekzistuese.

 “Dje Komisioni për sëmundje ngjitëse analizoi situatën rreth rritjes së rasteve me Covid-19 në nivel shteti, dhe vlerësimi është që kryesisht është nga mosrespektimi i rekomandimeve dhe masave të dhëna”, tha Shaban Memeti – Anëtarë i Komisionit për Sëmundje Infektive.

Memeti thotë se masa tjera restriktive për momentin nuk janë propozuar, por thekson se rregullat siç është mbajtja e maskës, dezinfektimi i duarve dhe distanca sociale duhet patjetër të respektohen.

 “Këto masa, ky standard i artë i mbrojtjes nga Covid-19, do të vazhdoj pavarësisht nga manifestimet, festat fetare, publike apo shtetërore,  grumbullime te caktuara  në objektet zyrtare dhe jozyrtare, ose në dasma rekomandimet vlejnë për të gjithë, dhe të gjithë duhet t’i respektojmë përndryshe do të kemi një rritje të rasteve me Covid-19”, shtoi Shaban Memeti.

Përderisa serish kemi rritje të rasteve, ministria e Shëndetësisë informoi se ka pranuar marrëveshjen për vaksina kundër Covid-19 nga kompania Pfizer/BioNTech, nw tw cilwn janë dhënë detaje në lidhje me shpërndarjen e vaksinave për vitin 2021.

 “Prodhuesi Pfizer/BioNTech në vitin 2021 do të shpërndajë 800280 doza të vaksinave në Republikën e Maqedonisë së Veriut. Sipas marrëveshjes, dorëzimi i vaksinave do të bëhet në 4 kuartale, ndërsa dorëzimi i parë do të bëhet në mars. Në Marrëveshja thuhet se kompania Pfizer/BioNTech këtë muaj do të dorëzojë 21 060 doza vaksinash në vendin tonë”, thonë nga Ministria e Shëndetësisë.

Vaksinat ishin premtuar se do të vijnë në muajin shkurt, por një gjë e tillë nuk ndodhi. Kryeministri Zaev tha se si Qeveria kanë bërë të pamundurën që vaksinat të vijën sa më parë.

 “Nuk bëhet fjalë për joseriozitet sepse e di e gjithë bota dhe populli jonë e di se arsyeja e vetme e vonesës ishte mungesa e vaksinave. (22.48) Ne jemi vend i vogël, por dua të siguroj se si Qeveria edhe Ministria e shëndetësisë, kemi bërë më shumë se çka është e mjaftueshme”, deklaroi kryeministri Zaev.

Në qendrat kovid në Shkup për 24 orë në spitale janë shtruar 39 pacientë të ri, ndërsa gjithsej po  trajtohen 323 pacientë për shkak të komplikimeve nga virusi korona. Një numër i madh i pacientëve janë në mbështetje të oksigjenit, kumtoi Ministria e Shëndetësisë.