Së shpejti debat për ndryshimet kushtetuese! Lloga: Duhet të bëhen edhe ndryshime tjera

Çështje ditësh është se kur do të formohet grupi i punës për përpilimin e amendamenteve kushtetuese për përfshirjen e bullgarëve në Kushtetutë, deklaroi ministri i Drejtësisë Krenar Lloga. Ai bëri të ditur se pjesë e ndryshimeve kushtetuese do të jenë edhe disa çështje kontestuese, megjithatë shtoi se prioritet mbetet preambula dhe futja bullgarëve në Kushtetutë.

 “Të mund të punohet në pjesën e ndryshimeve kushtetuese, lidhur jo vetëm me preambulën, por edhe me çështje të tjera të hapura, siç është pjesa e vakumit institucional. Ajo që ndodhi me z.Tupançevski dhe me mua, ku për arsye se nuk kishte se kush të nënshkruaj, mbeti eurobondi pa u nënshkruar, por edhe pjesët që u detektuan gjatë pandemisë, ku Kuvendi që ishte shpërndarë nuk mund të mblidhej për të sjellë vendime tjera, por edhe atë që kam kërkuar unë edhe në seancë qeveritare që pjesa e pjesëmarrjes sipas detyrës zyrtare të ministrit në Këshillin Gjyqësorë, pa të drejtë vote, të tërhiqet”, tha Krenar Lloga, ministër i Drejtësisë.

Lloga tha se pret që edhe opozita të jetë pjesë e grupit të punës sepse do të ketë edhe pjesë tjera për të cilët duhet të ndryshohen siç përmendi ndryshimet në Kodin zgjedhor, reformat në sistemin gjyqësor dhe në fushat tjera. Por se si do të binden VMRO-DPMNE që të votojnë ndryshimet kushtetuese, shefi i diplomacisë Bujar Osmani tha se partitë po e keqpërdorin këtë çështje vetëm për qëllime partiake dhe jo për interes të shtetit, sepse sipas tij VMRO-DPMNE nuk kanë asnjë argument se përse janë kundër.

“Mendoj se këto komunikime të vendeve anëtare, partnerëve serioz që japin garanci për  kredibilitetin e procesit, të cilët qëndrojnë siç thashë me ministren gjermane si mbrojtës të interesave tona në Europë do ta bindin edhe opinionin e gjerë edhe partitë politike dhe askush nuk do të guxojë ta vendos shtetin në izolim në 10 vitet e ardhshme në kushte kur ofrohet rrugë e shpejtë e rajonit drejt BE-së për shkak të punëve që i përmendëm. Do të jetë shumë e vështirë që të shtypet butoni i kuq”, theksoi Bujar Osmani, ministër i Jashtëm.

Ndërkaq dje VMRO-DPMNE edhe njëherë përsëriti qëndrimin se nuk votojnë për ndryshimet kushtetuese, ndërsa sfidoj pushtetin që këto ndryshime t’i vë në rend dite në Kuvend dhe do të shihet se kush do të votojë pro dhe kundër. Maqedonia duhet t’i sjellë ndryshimet kushtetuese deri në fund të këtij viti, gjegjësisht në nëntor kur pritet të përfundojë procesi i skriningut.