Rusia filloi luftë me Ukrainën ! Njerëzit në Kiev janë strehuar në metro, tollovi për të dalë nga qyteti

Sirena të cilat alarmojnë për sulme, sot në mëngjes i zgjuan qytetarët e Kievit. Në orën 5 të mëngjesit sipas kohës lokale, u dëgjuan edhe bombardimet e para. Shumica e njerëzve u nisën drejt metro-stacioneve nëntokësore për t’u strehuar, e shumë prej tyre morën edhe valixhe…

Disa orë më parë, Presidenti rus, Vlladimir Putin e paralajmëroi aksionin ushtarak.

“Rrethanat kërkojnë që të ndërmarrim hapa vendimtarë dhe të shpejtë. Republikat Popullore në Donbas kërkuan ndihmë nga Rusia. Në atë drejtim, në përputhje me Nenin 51, pika 7 nga Karta e OKB-së, me miratimin e Këshillit të Federatës dhe në përputhje me marrëveshjet për Miqësi dhe ndihmë të ndërsjellë me Republikën Popullore të Donjeckut dhe Luganskut, të ratifikuara nga ana e Kuvendit Federale, unë vendosa të zbatohen operacione speciale ushtarake”, tha Vlladimir Putin, president i Rusisë.

Në Ukrainë pas gjendjes së jashtëzakonshme, është shpallur edhe gjendja e luftës. Kjo do të thotë se është lejuar prani e shtuar e ushtrisë dhe të gjithë të mbajnë armë me vete.

“Të nderuar ukrainas, sot në mëngjes Presidenti rus, Putin paralajmëroi operacione speciale ushtarake në Donbas. Rusia sulmoi infrastrukturën tonë ushtarake dhe ushtarët tanë kufitarë. Në shumë qytete të Ukrainës po dëgjohen shpërthime. Është shpallur gjendje lufte në të gjithë vendin. Para një minute bisedova me Presidentin amerikan, Bajden. SHBA-të fillojnë të sigurojnë mbështetje ndërkombëtare. Sot kemi nevojë nga ju, secili prej jush të jetë i qetë. Nëse ka mundësi qëndroni në shtëpitë tuaja. Ne punojmë, armata punon. I gjithë sektori i sigurisë dhe i mbrojtjes në Ukrainë është duke punuar”, pohoi Vollodimir Zelenski, president i Ukrainës.

Kievi ka ndërprerë tërësisht fluturimet komerciale, prandaj shumë qytetarë hipën në autobusë për të dalë nga qyteti. U shkaktua kaos në komunikacion në Kiev.

Gjendja nëpër rrugët e Kievit është e qetë, nuk ka panik. Sipas banorëve, kjo situatë ishte e pritur. Pas shpalljes së gjendjes së jashtëzakonshme, mund të vërehen më shumë pjesëtarë të ushtrisë se zakonisht.