Rrugë të shkatërruara në Vizbeg! Biznesmenët ankohen , Qyteti i Shkupit nuk tregon për fillimin e punimeve

Ndonëse është rrugë magjistrale dhe zonë industriale që lidhë Maqedoninë me Kosovën, infrastruktura e kësaj pjese nuk është në gjendje të mirë. Përpos që mungon kanalizimi, pusetat gjithashtu nuk janë në nivel me rrugën, kështu që veturat hasin në vështirsi dhe dëmtohen derisa kalojnë nëpër këtë magjistrale, e quajtur si magjistralja e Adriatikut. Përpos magjistrales, në këtë pjesë është edhe rruga e vjetër e Kaçanikut, e cila gjithashtu është e dëmtuar tejmase.

Dragan Cvetanovski nga këshilli i qytetarëve të zonës industriale në Vizbeg, flet për rëndësinë dhe nevojën e përmirsimt të infrastruturës në këtë magjistrale. Sipas tij, ky problem qëndron vite me radhë, ndërsa tani siç shton, kanë marë informacione se Qeveria ka ndarë mjete deri te qyteti i Shkupit për fillimin e punimeve.

“Në çfarë gjendje është rruga e dini edhe vet. Nuk është diçka e re. Informacionet e fundit që i kemi është se Qeveria e Republikës së Maqedonisë ka ndarë mjete për sanimin e infrastrukturës në zonën industriale, përfshirë magjistralen e vjetër të Adriatikut, rrugën e Kaçanikut dhe rrugët tjera përreth. Të hollat sipas informacioneve jozyrtare që kemi, janë transferuar në një llogari të posaçme të qytetit të Shkupit dhe pritet realizimi. Ende nuk kemi informatë nga Qyteti i Shkupit, si kur dhe si, çfarë plani kanë”, tha Dragan Cvetanovski – Këshilli i Qytetarëve të zonës industriale Vizbeg.

TV21 kontaktoi me qytetin e Shkupit për të na konfirmuar këto pohime dhe për t’i pyetur se kur do të fillojnë punimet për sanimin e këtyre rrugëve, mirëpo deri në këto momente nuk kemi marë përgjigje.

Ndërkohë në këtë pjesë para pak muajsh u konstatuan edhe disa uzurpime të pronave shtetërore, të cilat duheshte të largohen nga inspektorati i komunës së Butelit. Atë periudhë u fillua me largimin e disa gardheve por ngeli në gjysmë. Pyetëm kryetarin e komunës së Butelit, Darko Kostovski, por edhe ai ngurroi të përgjigjet.

Përndryshe Cvetanovski në emër të afaristëve në zonën e Vizbegut paralajmëroi se nëse nuk dëgjohen kërkesat e tyre për përmirësimin e infrastrukturës, do të veprojnë me masa më radikale.