Nga viti 2027, telefonat inteligjentë dhe tabletët që shiten në Bashkimin Evropian do të duhet të pajisen me bateri të zëvendësueshme nga vetë përdoruesit, sipas rregullave të reja të miratuara në vitin 2023. Kjo masë është pjesë e një strategjie më të gjerë për të reduktuar mbetjet elektronike dhe për të ulur gjurmën e karbonit në kontinent.
Rregullorja, e cila pritet të hyjë në fuqi më 18 shkurt 2027, kërkon që bateritë të dizajnohen në mënyrë të tillë që të mund të hiqen dhe zëvendësohen pa nevojën e mjeteve të specializuara apo ndihmës profesionale. Në rastet kur nevojiten mjete të veçanta, ato duhet të ofrohen falas me pajisjen.
Një tjetër detyrim i rëndësishëm është që bateritë zëvendësuese të jenë të disponueshme për të paktën pesë vjet pas daljes në treg të modelit përkatës. Aktualisht, shumica e pajisjeve kanë bateri të integruara, të cilat shpesh mund të zëvendësohen vetëm nga specialistë, duke shtyrë konsumatorët të blejnë pajisje të reja edhe kur ato janë ende funksionale.
Sipas autoriteteve evropiane, këto rregulla mund t’u kursejnë konsumatorëve deri në 20 miliardë euro deri në vitin 2030, duke ulur kostot e riparimit dhe duke zgjatur jetën e pajisjeve.
Çdo vit në BE shiten rreth 150 milionë telefona dhe 24 milionë tableta, duke gjeneruar rreth 5 milionë tonë mbetje elektronike, nga të cilat më pak se 40% riciklohen siç duhet.