Raporti i KE-së thuajse i njëjtë me atë të vjetshmin – Euroambasadori Rokas: Është e rëndësishme të mos ketë kthim prapa

Në lidhje me sundimin e së drejtës dhe vlerat themelore, Maqedonia është e gatshme për anëtarësim në BE njëjtë si vitin e kaluar. Megjithatë nëse në raportin e vitit të kaluar të Komisionit në këtë sferë nuk kishim fare progres, tani KE regjistroi “progres të kufizuar”. Lufta kundër korrupsionit mbetet status-quo, por kësaj here është notuar gatishmëri më e mirë te lufta kundër krimit të organizuar.

Raportin për progresin e vendit krerëve shtetërorë ia dorëzoi euroambasadori Mihalis Rokas. Pas takimit me kryeministrin, Hristijan Mickoski, të dy theksuan se ai e përfshin periudhën nga shtatori i vitit të kaluar deri më tani, përkatësisht periudhë e tre Qeverive, duke përfshirë edhe Qeverinë teknike.

“U përgatit për periudhën e tre Qeverive dhe ka progres të caktuar apo kufizuar në disa sfera, por e rëndësishme është që nuk kemi kthim prapa dhe me përkushtim punojmë krah për krah, që pas një viti për të njëjtin do të themi është bërë progres i madh”, tha Mihalis Rokas.

Nga ana tjetër, Mickoski theksoi se nuk ka devijim nga reformat për transformim europian të shoqërisë. Ai tha se jemi pa arsye në dhomën e pritjes, por qëllimi i vetëm i qëndrueshëm dhe strategjik mbetet anëtarësimi në BE.

“Paraardhësit tanë është dashur që të bëjnë më shumë dhe më mirë, por tani ta lëmë këtë pas nesh, duhet t’i tejkalojmë përplasjet politike dhe të fokusohemi në atë që duhet të gjithë së bashku ta bëjmë. Nuk kemi kohë për të humbur. Po na pret edhe shumë punë, të gjithë neve, për shkak se reformat dhe rruga europiane janë proces i gjatë dhe gjithëpërfshirës”, tha Micksoki.

Në Raportin e Komisionit përsëritet se ndryshimet kushtetuese janë kusht për hapjen e klasterit të parë të negociatave.