“Pushojnë” protestat e kultivuesve të duhanit! Nga e hëna kthehen peshoret dhe vazhdon shitja e duhanit

Protestat e kultivuesve të duhanit “pushojnë”. Blerja e duhanit vazhdon të hënën. Kjo ishte zgjidhja që doli nga takimi i sotëm i përbashkët mes zyrtarëve të Ministrisë së Bujqësisë, kultivuesve dhe blerësve të duhanit. Përfaqësuesi i kultivuesve bëri thirrje që nga e hëna të kthehen në vendet e tyre pune dhe sërish t’i nxjerrin peshoret.

“Të vazhdojnë me punën. Secila kuti e cila nuk do të vlerësohet në mënyrë reale, të lihet anash. Në qoftë se vlerësuesi nuk pajtohet me vlerësimin, atëherë të lihet për në Komision të Shkallës së Dytë. Në qoftë se taksa është më e lartë se 5%, edhe ajo kuti të hiqet. Të lajmërohet Inspektorati që të dalë në vendngjarje”, tha Mende Stonaroski – përfaqësues i kultivuesve të duhanit.

Situata do të ndiqet deri të premten e ardhshme kur është caktuar takimi i ardhshëm në Ministrinë e Bujqësisë.

“Kërkesat e kultivuesve të duhanit janë reale dhe shqetësues, prandaj sollëm vendim të përbashkët, që nga e hëna të vendoset linja e rregullt për blerje të duhanit. Protestat nuk do të realizohen dhe të premten e ardhshme do të kemi takim shtesë me të njëjtën përbërje që të vlerësojmë nëse ka përmirësim në pjesën e blerjes së duhanit. Në bazë të këtyre përfundimeve do të vendosim si të veprojmë më tutje”, thonë nga Ministria e Bujqësisë.

Pakënaqësia e kultivuesve të duhanit është tepër e madhe theksojnë nga Bordi Iniciues.

“Deri të premten të sillet duhan. Linja do të jetë fleksibile në nivelin e vitit të kaluar. Nëse situata mbetet kështu siç është, ne i treguam se çfarë do të ndodhë, do të bllokojmë gjithçka. Do të humbim ne, por do të humbin edhe ata. Që të mos ndodhë kjo, të bëjmë Vuhan në Maqedoni, institucionet le t’i hapin sytë”, deklaroi Igor Mirçeski – Bordi iniciues i kultivuesve të duhanit.

Kërkesat e kultivuesve të duhanit janë vlerësim real i prodhimit dhe çmim minimal i blerjes prej 200 denarëve për kilogram. Ata edhe një herë u ankuan se blerësit manipulojnë me ta. Klasat më të larta i vlerësojnë më pak, reagojnë kultivuesit e duhanit. Nuk erdhëm këtu që të manipulojnë me ne, thonë të prekurit. Ne jemi profesionistë, e dimë punën tonë. Të mos ndodhë që ta lëmë lopatën dhe të hyjmë në politikë. Na lëni në bujqësi ku e kemi vendin, thanë kultivuesit e duhanit.