Punëtorët kulturorë pa sigurim shëndetësor, “Problemi është tejkaluar, një pjesë e pagave lëshohen nga sot”

TË FUNDIT

Në mes të epidemisë së Covid-19 dhe në periudhë kur e gjithë bota po përgatitet për gripin sezonal, punëtorët kulturorë kanë mbetur edhe pa sigurim shëndetësor. Kjo për shkak se ka tre javë që nuk marrin paga sepse drejtorët ku punojnë nuk kanë dorëzuar plan të sistematizimit.

Autoritetet kulturore sot qetësuan punëtorët kulturorë, premtuan se pagat do të fillojnë të lëshohen nga sot dhe me këtë do të riaktivizohet edhe sigurimi shëndetësor. Nëse punëtorët kanë paguar shërbime shëndetësore, këtë do të mund të kompensojnë atë më vonë nga Fondi Shëndetësor.


“Ata që i shfrytëzojnë shërbimet shëndetësore shtetërore, i paguajnë në privat, por pasi t’u paguhet sigurimi shëndetësor, shkojnë në Fondin Shëndetësor dhe e kthejnë shumën”, tha Sanja Arsovska nga Sindikata e Punëtorëve Kulturorë.

Pagat do të lëshohen në më shumë se gjysmën e institucioneve kulturore, pasi aq kanë përgatitur plan të sistematizimit sipas Marrëveshjes kolektive. Fatin e këtyre institucioneve nuk do ta kenë edhe punëtorët e 12 institucioneve kulturore të cilat ende nuk kanë dorëzuar plan të sistematizimit. Ministria e Kulturës nuk kumton emrat e institucioneve, por shton se nëse plani dorëzohet gjatë këtyre ditëve, procedura mund të përfundojë për dy javë dhe ndoshta edhe më shpejt.


“Shkaqet e problemeve janë tejkaluar dhe se pagesa e pagave fillon menjëherë për ato institucione të cilët janë të përgatitur. Institucionet tjera, do t’i fitojnë pagat në etapa pasi ta harmonizojnë sistematizimin me institucionet kompetente për të”, deklaroi Ministrja e Kulturës, Irena Stefoska.

TV21 paraprakisht ka njoftuar se punëtorët kulturorë ka 3 javë që nuk kanë marrë paga, dhe duke filluar nga dje të njëjtëve u është ndërprerë edhe sigurimi shëndetësor. Kjo ka ardhur si rezultat se drejtorët e institucioneve kulturore nuk kanë dorëzuar në kohë planet e sistematizimit i cili parasheh përcaktim të pagave vetëm me Marrëveshjen e re kolektive, ndërkohë që marrëveshjet tjera shfuqizohen. Sipas të dhënave të sindikatave, thuhet se pa paga kanë qenë reth 3 mijë punëtorë.