Punëtorët e tekstilit në korona krizë! Havziu: Inspektorati i punës ka pranuar më pak ankesa sesa në fillim

Gjashtë mijë ankesa deri te Inspektorati i punës kanë arritur që nga fillimi i kovid krizës dhe pjesa më e madhe e tyre kanë pasur epilog pozitiv – deklaroi në intervistën për TV21 drejtori i Inspektoratit shtetëror për punë, Alajdin Havziu. Thotë se pjesa më e madhe e ankesave kanë qenë për vendimin e Qeverisë për lirim nga puna të personave me sëmundje kronike dhe prindërve të fëmijëve deri në moshën 10 vjeçe, por edhe për kushtet në të cilët punojnë.

 “Këto ishin pjesa më e madhe e ankesave. Gjithashtu kishim edhe për kushtet e punës. Në fillim shkonte shumë vështirë, derisa të sigurohen mjete për dezinfektim, maska, kështu që me kalimin e kohës punëdhënësit e kuptuan se ky është realiteti dhe se ashtu duhet të jetë sepse atë e bëjmë edhe në shtëpi”, tha Alajdin Havziu – drejtor i Inspektoratit të punës.

Havziu thotë se në disa situata të caktuara janë ngritur edhe padi penale për shkak të largimit nga puna.

 “Dihet se në përputhje me ligjin punëdhënësi duhet të jap 30 ditë afat ligjor me njoftim në formë të shkruar për ndërprerje të marrëdhënies së punës. Të gjithë parashtresat që erdhën te ne në atë periudhë në lidhje me këtë, mendoj se arritëm me sukses që t’i kthejmë në punë ata që kanë marrë vendime joligjore”,Alajdin Havziu – drejtor i Inspektoratit të punës.

TV21 tashmë ka publikuar se kushtet në të cilat punojnë punëtoret e tekstilit edhe në kohë të virusit korona janë shqetësuese dhe të tmerrshme. Një punëtore e tekstilit, e cila për shkaqe sigurie deshi të mbetet anonime, tha se pronarët që të jenë të pastër para ligjit paguajnë pagë minimale, ndërsa më pas kërkojnë që në dorë tu kthehet një pjesë e parave.

 “Pronarët përsëri shërbehen me truke të vjetra që i kanë. Ai do të lëshojë 14.500 denarë dhe përsëri në dorë kërkon që t’ia kthejmë paratë. Kjo u ndërpre, por tani me koronën përsëri u shfaq. D.m.th. nuk u vjen aspak keq, as mëkat. Me përjashtime, që janë të pakët”, tha një puntore në industrinë e tekstilit.

Këto ditë për shkak të mos respektimit të masave për mbrojtje, virusi korona përsëri u kthye në fabrikat e Shtipit. Në takimin e fundit të shtabit të krizës, inspektorët kërkuan që përsëri të rriten kontrollet e transportit me autobusë, por dhe të mos ketë grupim të punëtorëve gjatë pauzave.