Punësimet e reja nëpër ministri, Ekonomistët: A po shkojmë qëllimisht drejtë deficitit buxhetor?

TË FUNDIT

Do të ketë punësime të reja në Administratën shtetërore edhe pse ende nuk janë sistemuar administratorët të cilët marrin paga dhe qëndrojnë në shtëpi.

E para është Ministria e financave, ku kërkohen për punësim 36 persona me marrëveshje të përkohshme, deri në fund të vitit. Pagat lëvizin nga 15.600 për referent e deri më 30.000 denarë për udhëheqës të sektorëve. Këto ditë konkurs për punësim është publikuar edhe në ueb faqen e Ministrisë së mbrojtjes, ku për këshilltarë pagat janë nga 35 mijë deri në 50 mijë denarë. Këshilltarë kërkon edhe Ministria e arsimit me pagë bazë prej 50 mijë e deri më 60 mijë denarë.

Nuk bëhet fjalë për rritje të numrit të të punësuarve, thuhet në kumtesën e Ministrisë së financave. Thonë se ministria ka nevojë për këto persona.

 “Bëhet fjalë për procedurë të rregullte administrative për rregullimin e vendeve të punës gjë për të cilën Ministria ka nevojë, e jo për rritje të numri të të punësuarve. Duke pasur parasysh se ishim në periudhë zgjedhore, ku kishte pengesa ligjore për punësim, tani u krijuan kushte për realizimin dhe plotësimin e vendeve të punës për periudhë të caktuar, deri në fund të vitit, për të cilat Ministria kishte nevojë. Për këtë qëllim janë siguruar mjete nga Buxheti i vitit 2020”, thonë nga Ministria e Financave.

Punësimet do të thonë ngarkesë e Buxhetit, vlerëson profesori universitar Sami Bislimi. Sipas tij kjo gjë në demokracitë evropiane nuk është e pranueshme.

 “Gjendja e Buxhetit është plotësisht e qartë. Në gjashtë muajt e parë të këtij viti, në krahasim me të njëjtën periudhë të vitit të kaluar, deficiti është 420 milion euro. Që është afërsisht 4 herë më shumë se vitin e kaluar. Shpenzimet e Buxhetit rriten, ndërsa të ardhurat e Buxhetit janë më të ulëta se në vitin 2019 për 8%. Kjo ngarkesë e Buxhetit do të na sjell deri te një situatë, supozoj deri në fund të vitit, të kemi deficit të Buxhetit prej rreth 1 miliardë euro”, tha Sami Bislimi, profesor universitar.

Bislimi thotë se nuk është momenti për punësime të reja, por gjithashtu as kapaciteti fiskal nuk është në nivel për një gjë të tillë.

 “Ne kemi numër të mjaftueshëm, mund të thuhet edhe shumë të madh, të të punësuarve në administratën shtetërore dhe publike dhe nëse ka nevojë persona nga një institucion i caktuar mund t’i transferojnë në institucion tjetër dhe të plotësohet numri i nevojshëm në ato institucione. Pse ka nevojë për punësime të reja?”, deklaroi Sami Bislimi, profesor universitar.

Ndryshimi i pushtetit nuk do të thotë edhe ndryshim i vendeve dhe strukturave udhëheqëse, janë institucione profesionale e jo agjenci për punësime partiake, thotë Bislimi. Përndryshe rreth 1400 persona që janë të punësuar në administratën shtetërore në bazë të Marrëveshjes së Ohrit qëndrojnë në shtëpi ndërsa marrin paga. Për ta, zv.kryeministri dhe ministri për sistem politik, Artan Grubi, paralajmëroi se së shpejti do të shpërndahen nëpër institucione.