Pse të theksohet përkatësia etnike? Jovanovska thotë se nuk është kriter, por nxitje për t’u kyçur

Subvencionim i pagave në baza etnike apo nxitje për punësimin e grupeve të ndjeshme të shoqërisë?

Çfarë nënkupton thirrja publike e Agjencisë për Punësim për Subvencionim të rrogave tek kompanitë e vogla dhe të mesme, në bazë të programit dhe masave për punësim, ku mes kategorive të tjera, përmendet edhe përkatësia etnike rome?

Drejtoresha e Agjencisë për Punësim, Biljana Jovanovska, thotë se kjo nuk determinon se kush do të pranohet në punë, por bëhet për t’i nxitur kategoritë e rrezikuara, përfshirë romët, të kyçen në masat punësim.

 “Të gjitha thirrjet publike janë për të gjithë personat e papunësuar, por themi se i nxisim kategoritë e rrezikuara të kyçen në planin operativ, në politikat dhe masat aktive, në të gjitha, jo vetëm në subvencionimin e pagave, ndërsa romët gjithkund në botë targetohen si një nga kategoritë më të ndjeshme e qytetarëve dhe motivohet kyçja e tyre në tregun e punës nga ana e tyre, pra thirrja publike është ndaj të papunësuarve”, thotë Biljana Jovanovska – Drejtoreshë e Agjencisë për Punësim.

Kompanitë duhet të plotësojnë vetëm tre kushte, siç janë pagesa e rregullt e rrogave, të jenë në fitim, përveç rasteve kur bëjnë ndonjë investim si dhe të mos e ulin numrin e të punësuarve. Nuk përmendet asnjë kriter tjetër se kë e si ta punësojnë kompania, shpjegon Jovanovska.

Por pse duhet veçuar romët në këtë rast, kur Kushtetuta vetë në nenin 32 e definon se “secili, në kushte të barabarta, e ka të arritshëm çdo vend pune”.

 “Gjithnjë ka qenë se romët janë kategori që punësohen vështirë. Nuk bëhet fjalë se nëse punësohet një rom, do të diskriminohet kushdo qoftë tjetër. Kjo nuk është e vërtetë! Njëjtë janë edhe mjetet financiare”, u shpreh Biljana Jovanovska – Drejtoreshë e Agjencisë për Punësim.

Mes kategorive të tjera në rrezik që parashihen në këtë masë të Agjencisë për Punësim janë edhe ish-të burgosurit, të pastrehët, ish-përdoruesit e drogës, persona pa dokumente, prindërit e vetëm e të tjerë që thirren për të aplikuar.