Propozimi i AAA për Asociacionin e Komunave Shqiptare/ Partitë në pushtet e shohin si destruktive dhe të papranueshme

Asociacioni i Komunave Shqiptare në RMV nuk ka pse të sjellë tensione ndëretnike, thotë sekretari gjeneral i Alternativës Zeqirija Ibrahimi, parti e cila e propozoi ndërmarrjen e kësaj nisem, ndërsa shton se propozimi do të ndihmonte në zhvillimin e komunave me shumicë shqiptare dhe avancimin e të drejtave të përgjithshme.

“Një asocioacion i komunave shqiptare vetëm se do të ndihmonte zhvillimin e komunave shqiptare. Ne e dimë mirëfilli se ka plot komuna shqiptare që gati janë pa resurse zhvillimore siç është komuna e Likovës, Haraçinës, Studeniçanit po edhe të tjera që mezi arrijnë të mbijetojnë”- deklaroi Zeqirija Ibrahimi, Sekretar Gjeneral i Alternativës.

I pyetur pse ky propozim erdhi pas daljes së Alternativës nga Qeveria, sipas Ibrahimit, e rëndësishme është se kjo çështje shkon në favor të shqiptarëve dhe nuk ka fare rëndësi se kush dhe kur e propozon.

“Po çfarë është e rëndësishme kjo, do të thotë ne edhe sikur ta kishim bërë duke qenë pjesë e Qeverisë apo sot a është e rëndësishme koha kur e bën apo kush e bën apo çështja çfarë duhet të bëhet.”- tha Zeqirija Ibrahimi, Sekretar Gjeneral i Alternativës.

Nënkryetari i partisë në pushtet, BDI-së, Arbër Ademi vlerëson se ky propozim përpos që është destruktiv për vendin, gjithashtu shkon edhe në dëm të Kosovës.

“Patetike, antiamerikane dhe antieuropiane dhe shkon në dëm të zgjidhjes përfundimtare të çështjes së Kosovës. Përpjekje e dështuar për mbijetesë në skenën politike pas fiaskos së përjetuar dhe rreshtim tërësisht i gabuar dhe destruktiv.”- deklaroi Arbër Ademi, Nënkryetar i BDI-së.

Për LSDM-në kërkesa e partisë së Afrim Gashit është i papranueshëm, ndërsa sipas tyre qëllimi është vetëm të fitohen pikë politike.

“Konsiderojmë se kjo është kërkesë e papranueshme dhe se bëhet fjalë për kërkesë me të cilën struktura të caktuara politike duan të përfitojnë një pjesë të trupit votues, por kjo është tërësisht joserioze. Nuk mund në asnjë mënyrë të bëhet krahasimi i gjendjes tonë me gjendjen në Kosovë sepse në përputhje me Ligjin për Vetëqeverisje Lokale, në përputhje me Ligjin për Bashkëpunim Ndërkomunal bashkëpunimi ndërmjet komunave në shtetin tonë është absolutisht i mundur.”- tha Sanella Shkrijel, deputete LSDM.

Nga ana tjetër edhe ish-bashkpartiaku i Ibrahimit, Skender Rexhepi – Zejdi, përmes Facebookut komentoi propozimin për Asociacion duke e vlerësuar si përpjekje për destabilizimin e sigurisë së vendit, megjithatë Ibrahimi nuk deshi të komentojë këto deklarata, siç i quan ai, absurde.

TV21 kërkoi qëndrim edhe nga Aleanca për Shqiptarët, por nuk u përgjigjën, ndërsa nga Besa thanë se do të prononcohen ditëve në vijim. Dje propozimin e Alternativës e komentoi kryetari i VMRO-DPMNE-së Hristijan Mickoski i cili paralajmëroi politikanët që mos të ndezin tensione ndëretnike, por të sillen me mençuri.