Në vend që të kenë fundjavë të lirë, deputetët do të duhet t’i lexojnë biografitë dhe të njoftohen me zëvendësministrat e propozuar në Qeveri. Mes tyre ka gazetarë, profesorë, kadetë… Zëvendësministri i deritanishëm i Financave, Bashkim Hasani, i cili është profesor i edukatës fizike, do të jetë zëvendësministër i mbrojtjes te Sheqerinska.
Nga “Telekomi”, Nazim Bushi kaloi në Ministrinë e Punëve të Brendshme. Në dosjen e tij arsimore qëndron se ka diplomuar në Akademinë Ushtarake në Zarë dhe në Fakultetin Pedagogjik në Shkup. Nga ana tjetër, zëvendësi i deritanishëm i MPB-së Agim Nuhiu, është propozuar për zëvendësministër në Ministrinë e Drejtësisë me të cilën udhëheq Bojan Mariçiq. Ai deri më tani dy herë ishte zëvendës dhe ministër i Punëve të Brendshme.
Politologu i diplomuar Ilhan Rahman, përfaqësues i komunitetit turk në vend, është propozuar për zëvendësministër për sistem politik dhe marrëdhënie mes komuniteteve, kurse Fatmire Isaku për zëvendëse të Bujar Osmanit në Ministrinë e Jashtme. Ajo është profesoreshë e gjuhës angleze dhe kuadro e PDSH-së.
Për zëvendësministër të Financave është propozuar Dimitar Kovaçevski, profesor në Kolegjin Amerikan në Shkup, kurse paraprakisht ishte drejtor i “Telekom-it” dhe “VIP-it”. Ekonomisti Zoran Manevski, ish-sekretar shtetëror në Ministrinë e Transportit dhe Lidhjeve dhe në Ministrinë e Ekonomisë, vjen si propozim për postin e zëvendësministrit në Ministrinë e Ekonomisë, kurse ministri i deritanishëm i Bujqësisë, inxhinieri bujqësor, Trajan Dimkovski, do të jetë zëvendësministër në resorin e njëjtë.
Mjeku traumatolog Ilir Hasani dhe ish-drejtor i Urgjencës dhe i Klinikës së Traumatologjisë, shkencëtar dhe përfaqësues i Maqedonisë në asociacionet me famë botërore, do të jetë zëvendësministër në Ministrinë e Shëndetësisë. Arafat Shabani, profesor i psikologjisë pedagogjike dhe ish-dekan i Universitetit të Tetovës, është propozuar për zëvendësministër të Arsimit. Enver Huseini nga Partia Demokratike e Turqve, arsimtar i diplomuar, i cili ishte ish-sekretar në Ministrinë e Punës dhe Politikës Sociale, vjen në postin e zëvendësministrit në këtë resor.
Gazetari dhe redaktori Zoran Dimitrovski, kuadër i Lidhjes Demokratike është propozuar për zëvendës të ministrit i cili udhëheq me Ministrinë e Vetëqeverisjes Lokale.
Aleksandar Bajdevski i cili është ekonomist, mbetet në vendin e zëvendësministrit të Shoqërisë Informatike dhe Administratës.
Sedat Sulejmani, i cili ka diplomuar për shkenca shoqërore dhe ka punuar në biznes privat, është propozuar për zëvendësministër në Kulturë.
Bekim Rexhepi do të jetë zëvendës në Ministrinë e Transportit dhe Lidhjeve. Ai është jurist i diplomuar, kurse ishte edhe anëtar i Këshillit Gjyqësor. Hristina Oxhaklieska, doktor i shkencave gjeografike është propozuar për zëvendësministre në Ministrinë e Mjedisit Jetësor dhe Planifikimit Hapësinor, si kuadër e partisë DOM (RDM).
Seanca kuvendore për zgjedhjen e zëvendësministrave është caktuar të martën në orën 11.