Po punohet në autostradën Kërçovë-Ohër, edhe 4 muaj deri në afatin e paraparë për ta lëshuar në përdorim

Kështu duket fillimi i autostradës së re nga Kërçova drejt Ohrit.

Këto janë pamje nga 12 km e para të autostradës në pjesën e Kërçovë, nga Krushina e deri në fshatin Izvor.

 “Ekipi i TV21 po qëndron në autostradën Kërçovë-Ohër por, jemi në pjesën e Kërçovës ku ndërtohet kjo autostradë për të parë se deri ku janë zhvilluar punimet dhe si po ecin punimet në këtë trase”, raporton Salije Sadiku-gazetare TV21.

Në këtë pjesë të autostradës po punohej ndërsa, makineritë shiheshin gjithandej.

Mbi 6 ura  janë ndërtuar dhe janë të kalueshme. Janë të vendosura edhe pjesët mbrojtëse ndërsa, pjesa tjetër është gërryer dhe po gërryhet që më pas të asfaltohet. Një pjesë e madhe e anësoreve malore është siguruar që të mos bie dheu.

Afati për përfundimin e kësaj autostrade po afrohet. Kanë mbetur edhe 4 muaj deri në momentin kur e njëjta duhet të lëshohet në përdorim për automjete por, nuk dihet nëse do të arrihet sepse, siç mund të shihet edhe pse është punuar, megjithatë ka edhe shumë për tu kompletuar.

 “Kjo që sapo patë dhe po shihni janë pamjet e trasesë nga Krushina e Kërçovës deri në fshatin Izvor të Kërçovës, d.m.th. siç mund të shihet traseja është e gërryer gati tërësisht dhe është e kalueshme. Ka pjesë ku duhet të asfaltohet, ndërsa urat janë të gjitha të ndërtuara. Në fshatin Podvis d.m.th. më poshtë nga këtu është edhe tuneli i parë i kësaj autostrade”, raporton Salije Sadiku-gazetare TV21.

Për të parë se si janë zhvilluar punimet në gjithë trasenë e kësaj autostrade nga Kërçova deri ën Ohër dhe deri ku janë punimet ne kontaktuam NP “Rrugët Shtetërore” por prej disa ditësh po presim përgjigje nga institucioni në fjalë.

Mbetet për tu parë nëse 31 dhjetori do të jetë dita kur në këtë autostradë të shumëpritur do të lëvizin automjetet dhe do të shkurtohet dukshëm rruga për në Ohër dhe Strugë, apo do të vazhdohet afati për përfundimin e së njëjtës siç ka ndodhur edhe në vitet e kaluara.

Ndryshe punimet për ndërtimin e kësaj autostrade kanë filluar në shkurt të vitit 2014, nën qeverisjen e udhëhequr nga VMRO-DPMNE dhe BDI dhe është dashur të përfundojnë deri në vitin 2018. Por ndërtimi u vonua dhe ndërkohë erdh qeveria e re. Sipas arsyetimit të institucioneve kompetente, zgjatja është kryesisht për shkak të zgjidhjes së çështjeve pronësore juridike, gabimeve në projektim dhe lëshimeve të tjera, siç janë hyrje daljet në autostradë.

Me një aneks të Marrëveshjes, fillimisht afati i ndërtimit ishte shtyrë deri më 30 qershor 2021 dhe më pas afati ishte shtyrë sërish edhe për dy vite të tjera, pra deri në fund të vitit 2023. Sipas vlerësimeve fillestare, ndërtimi i autostradës nga Kërçova deri në Ohër është dashur të kushtojë 374 milionë euro, por pas anekseve të shumta shtesë ka arritur në gati 600 milionë euro.