Përfundoi ndërtimi i rrethrrotullimit në Çair

Dje edhe zyrtarisht ka përfunduar shënimi i rrethrrotullimit që gjendet në Çair në rrugën “Kemal Sejfulla”. Siç ka bërë të ditur sot kryetari i Shkupit, Petre Shilegov i cili e ka vizituar rreth rrotullimin, ndërtimi ka zgjatur disa muaj, ndërsa vlera është 20 milion denarë.

“Bëhet fjalë për investim i cili do t’u mundësojë qytetarëve të kësaj ane siguri më të madhe në trafik duke pasur parasysh se në afërsi të këtij rrethrrotullimi gjendet shkolla fillore ‘Petar Zdravkovski Penko’, shkolla e mesme ‘Arseni Jovkov’ dhe poliklinika Çair që këtë udhëkryq e bënte seriozisht të ngarkuar dhe të pasigurt për qytetarët”, ka thënë Shilegov.

Realizimin e këtij projekti e ka komentuar edhe kryetari i Çairit, Visar Ganiu.

“Pamje e mrekullueshme e rrethrrotullimit të ri në Çair që tashmë lidh rrugën ‘Kemal Sejfulla’ me bulevardin ‘Brigada e Dytë Maqedonase’. Përfundoi edhe një proces efikas dhe cilësor i punës në agjendën e bashkëpunimit të Komunës së Çairit dhe Qytetit të Shkupit. Komunikacioni në këtë pjesë të komunës padyshim se po frymon më lirshëm se dikur”, ka thënë Ganiu.