Për deputetin e pavarur Skënder Rexhepi është e pakuptueshme hyrja e Aleancës për Shqiptarët në Qeveri dhe nuk e ka të qartë përse është e nevojshme të zgjerohet shumica. Ai thotë se shumicë në Kuvend ka pasur dhe ka edhe tani, por megjithatë nëse ASh vendosë të jetë pjesë e Qeverisë i uron mirëseardhje.
“Kinse për BE, por në esencë nuk është ajo sepse ndryshimet kushtetuese nuk sigurohen me hyrjen e Aleancës. Do të duhen diku edhe 6 apo 7 deputet apo edhe disa tjerë, d.m.th. janë interesa partiake, por pa dyshim është e drejtë e tyre”, tha Skender Rexhepi, deputet i pavarur.
Sipas tij, as ish-partia e tij Alternativa me shumë gjasa nuk do të dalë nga kabineti qeveritar.
“Ata do të qëndrojnë pjesë e Qeverisë qoftë edhe me një dikaster të vogël dhe ose do të qëndrojnë turpshëm ose do të duhet të largohen me krenari”, pohoi Skender Rexhepi, deputet i pavarur.
Rexhepi tha se do të largohej nga shumica parlamentare vetëm në qoftë se Qeveria nuk do të realizojë pikën për të cilën ai ka insistuar në periudhën kur është nënshkruar marrëveshja politike mes Alternativës dhe Qeverisë. Për këtë arsye ai pret që të definohen njëherë punët mes Gashit dhe Kovaçevskit. Sipas VMRO-DPMNE-së Qeveria nuk ka shumicë as për të miratuar rendin e ditës e lerë më për ndryshimet kushtetuese.
“Mendimi ynë është se për momentin nuk i kanë 61 deputetë dhe për këtë arsye nuk punon as Kuvendi, gjegjësisht bllokada aktive e deputetëve të VMRO-DPMNE-së momentalisht është ndërprerë, ata e bllokojnë vetveten sepse nuk kanë 61 deputetë as për të funksionuar Kuvendi”, tha Nikolla Micevski, koordinator i g.p. VMRO-DPMNE-së.
Nga Alternativa thonë se ASh është mirë ta tregojë arsyen e saktë se përse do të hyjë në Qeveri. Sipas Sekretarit të Përgjithshëm këtë duhet ta bëjë edhe LSDM-ja. Por sipas Bekim Salit arsyeja e hyrjes është kjo:
“Arsyeja e vetme e këtyre bisedimeve për shtim të shumicës parlamentare është vetëm heshtja e grupit të zjarrit apo shuarjen totale të zjarrit, brenda BDI-së”, tha Bekim Sali, sekretar i përgjithshëm i Alternativës.
Edhe për grupin e zjarrit, hyrja e ASh në koalicionin qeveritar nuk ka bazë e as argumente politike.
“Duke pasur një koalicion, një mazhorancë prej 64 deputetëve që mjaftojnë të funksionojë Qeveria, do të marrin prej atyre 10 që janë në opozitë do t’i fusin brenda do të bëjnë 72 deputetë, nuk e dinë sa do të ikin. Pra këta janë thjesht akrobacione për të shpëtuar Artan Grubin. Thjesht nuk është Aleancë për Europë, por është Aleancë për Artanin”, tha Izet Mexhiti, deputet BDI.
Derisa vazhdojnë dilemat nëse ASh duhet të jetë ose jo pjesë e Qeverisë, nga kjo parti sipas informacioneve jozyrtare, pritet që të intensifikohen takimet për bisedimet rreth ndarjes së resorëve. Takimet do të jenë të formateve të ndryshme mes grupeve të punës dhe jo mes kryeministrit Kovaçevski dhe kreut të ASh-së Taravari.