Dera është e hapur për PDE-në dhe çdo parti tjetër që dëshiron t’i bashkangjitet frontit evropian. Kjo ishte përgjigja e ministrit të jashtëm Bujar Osmani i pyetur nëse kanë zhvilluar bisedime me Partinë Demokratike Evropiane, parti kjo e sapo formuar nga Arjanit Hoxha, që e njejta të mer disa poste në pushtet.
“Për këso gjëra konkretisht nuk kam informacione. Ajo që mund të them është se ideja është të promovohet fronti evropian. Asnjëherë si deri tani, shoqëria nuk është polarizuar në Evropë dhe jo evropë. Tani është koha kur hapen rrugët, tani kur kalohet udhëkryqi, koha është secili të pozicionohet. Për këtë shkak, fronti evropian është i hapur për të gjithë, pavarësisht të partive politike, në bazë të përkatësisë etnike, përkatësisë ideologjike apo përkatësi tjetër jashtë BE-së. Kështu që në frontin evropian ka vend edhe për partinë e Arjanit Hoxhës dhe partive tjera të cilat mendojnë se tani është koha pas kësaj të Sharl Mishel, më nuk ka hapësirë për humbje kohe”, tha Bujar Osmani – ministër i Jashtëm.
TV21 pyeti Hoxhën nëse së paku kanë filluar bisedimet për një gjë të tillë por ai shkurtimisht tha që “Nuk ka asnjë bisedim”.
Por Hoxha edhe në kuvendin themelues të partisë ku u zgjodh si kryetar partie, pati deklaruar se si parti, do të jenë pjesë e koalicioneve fituese të cilat do të sigurojnë të ardhmen evropiane të vendit.
“Absolutisht besoj se do jetë kombinim ngadhënjyes dhe fitues. Do jetë ashtu siç kemi treguar në të kaluarën se këta janë njerëz të një strukture politike që bashkarisht kemi udhëtuar ndër vite dhe besoj që do jemi në kombinime fituese por ajo që është e rëndësishme, në kombinime të cilat do të sigurojnë të ardhmen evropiane të vendit”, theksoi Arjanit Hoxha – kryetar I PDE-së.
Analisti Imer Selmani, në SummerClick pak ditë më pare pati thënë se është legjitime të mendohet që PDE do t’i mer mbi vete disa poste të cilat kanë mbetur nga largimi I Izet Mexhitit nga BDI.
“Është legjitime të mendohet se ndoshta me ofertë të re BDI ka për synim eventualisht të neutralizon një pjesë të demit por nga ana tjetër edhe të zgjeron frontin evropian për ndryshimet kushtetuese. Por pse mos të cekim edhe parapërgatitjet për zgjedhjet e radhës të vitit 2024”, tha Imer Selmani – ish zv/kryeministër.
Përndryshe nuk përjashtohet mundësia që edhe deputeti Skender Rexhepi me partinë e tij të re të cilën e ka paralajmëruar, t’i bashkohet frontit europian. Kjo u nënkuptua nga deklarata e Rexhepit në SummerClick, kur tha se nuk do të kthehej në një anije e cila po fundoset, duke aluduar për ish partinë e tij, Alternativën.