Patjetër të ketë dënime që të mos përsëritet, LSM: Punëdhënësit e papërgjegjshëm vjedhin edhe punëtorët edhe shtetin

Punëdhënësit e pandërgjegjshëm vjedhin edhe punëtorët edhe shtetin – reagon Sindikata e punëtorëve. Pasi që DAP publikoi se 179 kompani e kanë keqpërdorur ndihmën financiare shtetërore, e cila në vend se te punëtorët, ka përfunduar në xhepat e pronarëve. Lidhja e sindikatave kërkon nga DAP të bëjë pagesë urgjente të detyrueshme.

“Ne patjetër duhet që si partnerë social të gjejmë model për këta pronarë të pandërgjegjshëm së pari për t’i dënuar në një mënyrë dhe kjo të mos përsëritet për shkak se përveç punëtorëve këtu po vidhet edhe shteti”, tha Darko Dimovski, kryetar LSM-së.

Atë që e bënë punëdhënësit për herë të dytë është tendencioze, thotë Dimovski, duke shtuar se në të ardhmen duhet të gjendet model se si me të vërtetë të mbrohet punëtori. Janë të habitur, siç thonë, se nga e marrin guximin punëdhënësit për të keqpërdorur paratë që u janë dhënë nga shteti për pagesën e pagave, edhe pse e dinë se ekziston klauzolë për vepër penale me burg prej minimum 1 viti.

“Unë nuk e di cila është matematika, të vjedhësh para dhe nesër të vuash burg ndërsa pas teje të lësh në skaj të ekzistencës punëtorë që me mundin e tyre e kanë bërë kapitalin tënd”, shtoi Dimoski.

Secili që e ka shkelur ligjin do të përgjigjet, theksoi para disa ditëve edhe drejtorja e DAP.

“Secili që ka shkelur ligjin do të përgjigjet. Po, ndoshta janë shumë të ulëta sanksionet në pjesën e procedurës kundërvajtëse por thamë që të mos ndalojmë këtu, andaj po zbatojmë procedura për pagesë të detyrueshme. Pas gjithë analizave të bëra që i kemi hapur me urdhra adekuat që duhet të dorëzohen në Inspektoratet që të hyjnë në gjithë kompanitë që kanë bërë keqpërdorim të tillë me qëllim që të shohim se si ka qenë puna e tyre”, deklaroi Llukarevska.  

Punëtorëve nuk  u duhen procedura të gjata, por u duhet rrogë, thanë nga LSM-ja. Prej atje insistojnë që ndihma shtetërore për rroga të shkojë drejtpërdrejtë në llogari të punëtorëve. Reagimi i LSM-së vjen pasi DAP-i doli me informacion se 179 kompani kanë marrë ndihmë për t’i paguar pagat megjithatë rreth 300 punëtorë nuk kanë marrë rrogë, ndërsa 506 punëtorë në 24 kompani kanë marrë rrogë më të ulët.