Pakoja e katërt e masave, të dielën pasdite! Disa masa vlejnë deri në vitin 2021 paralajmëroi kryeministri

Deri të dielën pasdite, Qeveria do ta prezantojë pakon e katërt të ndihmës ekonomike, paralajmëroi kryeministri Zoran Zaev. Pritjet se kjo të ndodhë sot, ranë në ujë, sepse sipas Zaevit, ka nevojë për harmonizime shtesë. Sot, kryeministri dhe ekipi ekonomik do të takohen me odat ekonomike, kurse nesër një ekip tjetër qeveritar do të mbajë takim me sindikatat dhe punëdhënësit.

Zaev shpjegoi se Qeveria nuk guxon të sjellë vendime deri në muajin mars, për kur paralajmëroi edhe pako të tjera. Në këto masa, ka edhe të tilla që do të zgjasin deri në fund të vitit 2021.

“Kemi disa vazhdime të akontacionit për shkak se lirimi nga tatimet ose disa masa tjera që duhet që tani t’i dinë kompanitë që të mund të parashohin edhe në shkurt. Por masat e mëdha, ajo që do të thotë mbështetje të pagës ose mbështetjen e konsumit privat me kartelat e reja, ata janë pakot e reja që vlejnë deri në fund të vitit”, tha Kryeministri Zoran Zaev.

I pyetur nëse në sektorët më të goditura, të punësuarve do t’i paguhen edhe kontributet për tre muaj, Kryeministri tha:

“Ka masa edhe më të targetuara. Qëllimi është të jetë pako minimale, pagë minimale deri më 30% të drejtë për aplikim, siç rritet goditja e sektorit, ashtu do t’i rritet edhe ndihma kompanisë dhe do të vijë deri te bruto paga minimale. Ata që janë mbi 80%,ata janë edhe më të targetuar për shkak se jo të gjithë vuajnë nga korona kriza. Për ata që janë më pak se 30% të goditur kemi mekanizma tjerë për ndihmë përmes prolongimit të tatimeve, kredi të lira”, u shpreh Zaev.

Para pak kohe kryetari i Organizatës së punëdhënësve, Angell Dimitrov për TV21 foli pikërisht për këtë problematikë.

“Të mësuar nga seti i fundit i masave, doli se Qeveria ka siguruar shumë më të madhe të mjeteve nga ata që janë ndarë për shkak se kriteret ishin të tilla, vetëm kompanitë që janë me të vërtetë të goditura, ata me mbi 30% rënie të të ardhurave, ndërsa kompanitë që kishin 26,27% nuk morën ndihmë të tillë. Mendoj se tani edhe Qeveria është e vetëdijshme se duhet të ketë më shumë kritere të tilla që të mundet të gjithë kompanitë të marrin ndihmë të tillë, ndihma të jetë e ndryshme, e jo, të themi, të gjithë të marrin nga 14.500 denarë”, thotë Angell Dimitrov, Kryetar i Organizatës së Punëdhënësve.

Kryeministri foli edhe për ligjin e ri të paralajmëruar për dalje të parakohshme në pension për të cilin tha se do të vlejë edhe për sektorin publik edhe për atë privat duke theksuar se dalje në pension në moshën 64 vjeçare është e obligueshme me mundësi që gratë të mund të dali në pension me 62 vjet të mbushura.