Vlora Çitaku është zgjedhur nënkryetare e Kuvendit të Kosovës, pas votimit pa asnjë votë kundër, që u bë sot në parlament.

Numri dy i PDK-së mori 95 vota, ku përfshiheshin edhe ato të Vetëvendosjes, parti kjo që më parë kishte refuzuar ta votojë atë për këtë pozitë.

Çitaku u propozua për këtë pozitën nga shef i grupit parlamentar të PDK-së, Arian Tahiri.

Me rastin e zgjedhjes në pozitën e re, deputetja e PDK-së mori një urim nga shefja e Kuvendit.

“Urime zonja Çitaku”, tha Albulena Haxhiu.

Kuvendi i Kosovës ka miratuar deklaratën lidhur me aktgjykimin e Dhomave të Specializuara në Hagë për Hashim Thaçin, Kadri Veselin, Jakup Krasniqin dhe Rexhep Selimin.

Nisma për këtë deklaratë ka ardhur nga Partia Demokratike e Kosovës, ndërsa përmbajtja e saj është harmonizuar mes të gjitha grupeve parlamentare shqiptare.

Përmes deklaratës, Kuvendi shpreh shqetësim të thellë për aktgjykimin e shkallës së parë. Në të njëjtën kohë, deputetët kanë ngritur shqetësime lidhur me mungesën e transparencës dhe respektimin e standardeve të një gjykimi të drejtë.

Në deklaratë thuhet gjithashtu se Kuvendi e konsideron të papranueshëm përfundimin mbi ekzistencën e një qëllimi kriminal të përbashkët, si dhe përgjegjësinë që, mbi bazën e këtij përfundimi, u është atribuuar Hashim Thaçit, Kadri Veselit, Jakup Krasniqit dhe Rexhep Selimit.

Deklarata e plotë:

Kuvendi i Republikës së Kosovës, si institucioni përfaqësues i qytetarëve dhe shprehje e vullnetit të tyre demokratik, në seancën plenare të mbajtur më 28.09.2026;

Duke kujtuar se liria dhe pavarësia e Kosovës janë fryt i një përpjekjeje të gjatë për dinjitet njerëzor, barazi dhe të drejtën e një populli për të vendosur vetë për të ardhmen e tij;

Duke rikujtuar se lufta e popullit për liri dhe pavarësi përmes Ushtrisë Çlirimtare të Kosovës lindi në rrethanat e represionit sistematik dhe krimeve gjenocidale të Serbisë, kur popullit të Kosovës po i mohoheshin të drejtat themelore dhe vetë mundësia për të jetuar i lirë në vendin e tij;

Duke njohur rëndësinë vendimtare të ndërhyrjes së NATO-s për ndalimin e dhunës ndaj popullit të Kosovës dhe për çlirimin e vendit.

Duke theksuar se asnjë aktgjykim nuk mund ta zhbëjë të vërtetën historike të luftës në Kosovë. Serbia ushtroi gjenocid e krime kundër njerëzimit; zhvilloi një fushatë të egër terrori dhe spastrimi etnik në Kosovë; masakroi civilë të pafajshëm, vrau fëmijë, gra e të moshuar, dhunë seksuale si armë lufte, dëboi me forcë popullsinë dhe dogji e shkatërroi fshatra e qytete të tëra. Këto krime ishin sistematike, pasojat e të cilave rëndojnë edhe sot mbi mijëra familje.

I bindur se respektimi i shtetit të së drejtës përfshin edhe të drejtën dhe përgjegjësinë për të kundërshtuar, me mjete ligjore dhe institucionale, një aktgjykim që vlerësohet i padrejtë;

Liria dhe pavarësia e Kosovës janë të lidhura ngushtë me sakrificën e brezave, me rezistencën politike dhe paqësore të udhëhequr nga Presidenti Ibrahim Rugova, me luftën e Ushtrisë Çlirimtare të Kosovës (UÇK) dhe me mbështetjen vendimtare të aleatëve tanë perëndimorë, përfshirë NATO-n.

Miraton këtë deklaratë:

1. Kuvendi i Republikës së Kosovës, si institucioni përfaqësues i qytetarëve dhe shprehje e vullnetit të tyre demokratik, shpreh shqetësimin e tij të thellë ndaj aktgjykimit të shkallës së parë kundër Hashim Thaçit, Kadri Veselit, Rexhep Selimit dhe Jakup Krasniqit.

2. Konsideron si të papranueshëm përfundimin për ekzistencën e një qëllimi kriminal të përbashkët.

3. KËRKON nga të gjitha institucionet shtetërore të Republikës së Kosovës që të ndërmarrin të gjitha veprimet e nevojshme për mbrojtjen e së vërtetës dhe të pastërtisë së luftës çlirimtare të popullit të Kosovës. Kuvendi bën thirrje për hartimin e një strategjie të përbashkët shtetërore, në kuadër të së cilës të bashkërendohen veprimet juridike, institucionale dhe diplomatike për mbrojtjen dhe afirmimin e së vërtetës së plotë historike mbi luftën e drejtë për liri dhe çlirim të Kosovës.

4. Në Kosovën e viteve 1998–1999, ekzistenca e një ndërmarrje të përbashkët kriminale për dëbimin e shqiptarëve nga Kosova është vërtetuar tashmë me aktgjykime të Tribunalit Ndërkombëtar për ish-Jugosllavinë, ndaj drejtuesve politikë, ushtarakë dhe policorë të Jugosllavisë dhe Serbisë. Ajo u zbatua përmes strukturave të një shteti që kishte nën kontroll ushtrinë, policinë dhe mjetet e tjera të pushtetit. Ky është konteksti historik dhe gjyqësor që duhet të mbetet i qartë sa herë flitet për luftën në Kosovë.

5. Kërkon nga Dhomat e Specializuara të respektojë mandatin në përputhje me vullnetin e Kuvendit të Republikës së Kosovës.

6. KUNDËRSHTON çdo përpjekje për të përmbysur të vërtetën historike të Kosovës, për të vënë në dyshim luftën e saj çlirimtare apo për të barazuar popullin që luftoi për liri dhe mbijetesë me regjimin që e shtypi atë.

7. E vërteta e luftës çlirimtare, drejtësia për viktimat dhe familjet e tyre dhe e drejta e të dënuarve për një gjykim të drejtë i përkasin së njëjtës Republikë. Kuvendi do t’i mbrojë të tria pa kompromis.

Kuvendi i Kosovës duhet t’i shfrytëzojë këto ditë për t’i dalë në mbështetje ish-krerëve të UÇK-së, tha deputeti i Aleancës, Ramush Haradinaj.

Sipas tij, edhe nëse s’ka dakordim për presidentin dhe shkohet në zgjedhje të reja, Kuvendi duhet që deri më 6 tetor t’i bashkohet zërit të qytetarëve se “dënimi i Gjykatës Speciale ndaj katërshes së UÇK-së nuk ishte në emrin tonë”.

Aktualisht, në Kuvend është proceduar projektligji për ndryshimin e ligjit për Dhomat e Specializuara, ndërkaq në seancën e sotme pritet të miratohet një deklaratë në mbështetje të Hashim Thaçit, Kadri Veselit, Jakup Krasniqit dhe Rexhep Selimit.

“Gjykata e konfirmoi se më 6 tetor mbyllet afati për të zgjedhur presidentin. Kjo i bie se janë shumë pak ditë dhe kuptohet, gjithë kjo kohë është djegur qëllimshëm nga LVV-ja dhe Kurti. Këto ditë të mbetura janë të rëndësishme për krijimin e institucioneve dhe për t’iu përgjigjur zërit të qytetarëve, i cili veçse po rritet çdo ditë e më shumë, jo vetëm në Kosovë. Vendim dënues për udhëheqësit e UÇK-së është i papranueshëm, i padrejtë, për shkak se UÇK-ja ka bërë luftë çlirimtare dhe s’është në emrin tim dhe as në emrin tonë. Kuvendi duhet t’i shfrytëzojë këto ditë, edhe nëse nuk i krijon institucionet, që t’u bashkohet qytetarëve”, tha ai.

Haradinaj, duke hyrë në Kuvendin e Kosovës, akuzoi kryeministrin Albin Kurti se qëllimi i tij nuk është zgjedhja e presidentit, por shkuarja në zgjedhje të reja.

“Qëllimi ka qenë shkuarja në zgjedhje dhe jemi në zgjedhje, përderisa çdo gjë shkon drejt zgjedhjeve. Do të ishte e turpshme me i lënë këto ditë pa i shfrytëzuar, të paktën me u bërë bashkë me popullin, jo në emrin tonë… Ne kemi dhënë ofertën tonë me ndihmu krijimin e institucioneve, edhe pse e kemi ditur se është lojë e Kurtit. Ai i ka ftuar në takime dhe ka tallur dhe i ka lënë pa marrëveshje. Nuk jemi pjesë e lojërave të tij dhe nuk do të bëhemi”, përfundoi ai.