Gjashtë persona kanë vdekur pasi një ndërtesë banimi u shkatërrua në Athinë si pasojë e një shpërthimi, që sipas autoriteteve ka gjasa të jetë shkaktuara nga rrjedhja e gazit.

Besart Xhaferri, nga forumi rinor i Partisë Demokratike, ka shkruar në rrjetet sociale se në mesin e viktimave janë tre shqiptarë, përfshirë motër e vëlla. Ai ka kërkuar që për këtë rast të reagojë Ambasada e Shqipërisë në Athinë dhe Ministria e Jashtme. Disa media shqiptare, duke u thirrur në burime, po ashtu kanë publikuar emrat e viktimave që raportohet se janë me origjinë shqiptare.

Radio Evropa e Lirë i është drejtuar me pyetje Ministrisë së Jashtme të Shqipërisë nëse është në dijeni që në mesin e viktimave ka edhe persona me orgjinë shqiptare, por ende nuk ka marrë përgjigje.

Agjencia AFP raportoi se sipas autoriteteve greke, në mesin e viktimave ishin katër shtetas amerikanë, që po vizitonin Greqinë. Ata po qëndronin në ndërtesën që u shkatërrua nga shpërthimi, e që gjendet afër zonës së Akropolit.

Ata, sipas mediave greke, dhe ndërkombëtare, po përgatiteshin që të ktheheshin në Shtetet e Bashkuara kur ndodhi shpërthimi.

Ndërkaq, The New York Times raportoi se familja amerikane përbëhej nga një çift, së bashku me djalin e tyre dhe të dashurën e tij.

Autoritetet greke nuk kanë bërë publike identitetet e viktimave, moshën apo se prej cilit vend në SHBA ishin.

Dy viktimat e tjera raportohet se janë një i moshuar nga Britania dhe gruaja e tij greke, që jetonin në katin e dytë të ndërtesës trekatëshe, ka raportuar transmetuesi shtetëror grek, ERT.

Shpërthimi ndodhi të premten dhe me gjasë është shkaktuar nga rrjedhja e gazit, tha kryetari i Athinës, Haris Doukas.

Si pasojë e shpërthimit u dëmtuan edhe disa shtëpi në afërsi, si dhe dyqane e makina.

Eric Wendt ka marrë detyrën e ambasadorit të SHBA-së në Shqipëri. Gjenerallejtënant (në pension) i Forcave Speciale “Bereta e Gjelbër” Wendt, ka punuar më parë si Profesor i Praktikës, duke dhënë mësim Komandim dhe Udhëheqje në Shkollën Pasuniversitare të Marinës.

Kur ishte ende në shërbim aktiv si gjeneral me tre yje, u dislokua në Evropë dhe shërbeu si Komandant i Shtabit të Operacioneve Speciale të Organizatës së Atlantikut të Veriut (NATO). Ai ka komanduar të gjitha Forcat e Operacioneve Speciale të caktuara për NATO-n (përfshirë edhe njësitë shqiptare të operacioneve speciale) dhe ka punuar në Shqipëri me drejtues dhe ushtarakë të mbrojtjes.

Shërbimi i tij përfshiu 55 muaj dislokim në operacione luftarake në zona të ndryshme të botës, përfshirë një vit në Afganistan si Zëvendës-Komandant Rajonal, ku përfshihej edhe mbikëqyrja e ushtarakëve nga Shqipëria.
Gjatë më shumë se 34 viteve të shërbimit aktiv, ai ka mbajtur disa pozicione të larta komanduese dhe ka udhëhequr organizata me personel civil dhe ndërinstitucional që shkonin deri në mijëra persona. Ka shërbyer si Shef i Shtabit të Komandës së Paqësorit të SHBA-së.

Siç shkruan ambasada amerikane në biografinë zyrtare, Wendt ai ka punuar për Departamentin e Shtetit të SHBA-së për dy vjet si pjesë integrale e Ambasadës së SHBA-së në Jeruzalem, ku udhëhoqi një koalicion prej tetë vendesh si Koordinator i Sigurisë i Shteteve të Bashkuara për Izraelin dhe Autoritetin Palestinez dhe raportonte drejtpërdrejt te Sekretari i Shtetit.
Ai ka përvojë të gjerë si drejtues, aftësi të provuara për menaxhimin e organizatave komplekse shumëkombëshe dhe ndërinstitucionale, si dhe ekspertizë rajonale në të gjithë Evropën.

Gjenerallejtënant (në pension) Wendt ka përfunduar studimet Bachelor në Universitetin e Kalifornisë, Santa Barbara, dhe studimet Master në Shkollën Pasuniversitare të Marinës, Monterey, Kaliforni.

Ai flet gjuhët arabe dhe koreane. Është fitues i shumë çmimeve dhe dekoratave, përfshirë Shiritin dallues “Ranger”, Shiritin dallues të Forcave Speciale, Shenjën dalluese Parashutist Mjeshtër, Shenjën dalluese Mjeshtër i Këmbësorisë në Luftim, Medaljen e Shërbimit të Shquar të Mbrojtjes, dy herë fitues i Medaljes së Shërbimit të Shquar, tri herë fitues i Medaljes “Ylli i Bronztë”, si dhe Çmimin e Lartë të Nderit të Departamentit Amerikan të Shtetit.

Ministrja e Drejtësisë në Kosovë, Donika Gërvalla, i ka mohuar akuzat për bashkëpunim me Dhomat e Specializuara të Kosovës, duke thënë se nuk ka pasur asnjë pikëtakim me Specialen, UNMIK-un apo EULEX-in, as drejtpërdrejt e as tërthorazi. Ajo në një konferencë për media të mbatjur sot ka deklaruar se nuk ka heshtur pas aktgjykimit dënues ndaj katër ish-drejtuesve të Ushtrisë Çlirimtare të Kosovës dhe se si ministre është angazhuar për përgatitjen e hapave ligjorë.

“Deklaratat që më lidhin me bashkëpunimin janë bërë bozë. Nuk ka në asnjë hallkë, as me UNMIK-un, as me EULEX-in, as me Gjykatën Speciale, nuk ka asnjë pikëtakim timin, as direkt, as indirekt”, ka thënë Gërvalla në një konferencë për media të shtunën.

Gërvalla ka thënë se nuk ka heshtur lidhur me aktgjykimin ndaj katërshes së UÇK-së, duke theksuar se reagimi i kryeministrit është bërë në emër të Qeverisë, ndërsa ajo, si ministre e Drejtësisë, është marrë me përgatitjet ligjore.

“Sa i përket heshtjes, nuk kam heshtur, jam ministre e Drejtësisë. Kryeministri ka dhënë një deklaratë në emër të qeverisë. Unë me ekipin tim qysh në ditën e parë i jam futur punës me qëllim që të përgatitemi për një betejë sepse çështja e Speciales është betejë ligjore, jo e deklaratave në media. Duhet të jemi profesionistë të mençur, pa shumë bërtima. Duhet të përgatitemi për instancën e ardhshme (Apelin)”, tha ajo.

Ajo ka kërkuar durim deri në publikimin e aktgjykimit të plotë, duke thënë se atëherë, sipas saj, do të bëhen të qarta faktet dhe do të mund të vlerësohen zhvillimet.

“E kam një shpresë, ata që kanë bërtitur më shumë në këtë lëmi, ata që më së shumti më kanë etiketuar, të paktën para pasqyrës të skuqen që nuk kanë dëgjuar faktet, por kanë zgjedhur t’i përsërisin gënjeshtrat që i kanë vetë në qarkullim”, ka deklaruar ajo.

Tutje ajo ka pohuar se po e analizon projektligjin e propozuar nga Partia Demokratike e Kosovës për Dhomat e Specializuara. Sipas saj, opinioni i kësaj ministrie do t’i niset më pas Qeverisë.

“Shumica e gjërave që lidhen me Dhomat e Specializuara janë cështje të ekspertizës së lartë. Në MD janë ekspertët që po e analizojnë projektligjin e propozuar nga PDK, kur ta kemi gati do të t’ia dërgojmë qeverisë opinionin tonë. Nuk do ta vonojmë, do ta dërgojmë shpejt. Por as nuk do të nxitojmë, e ta paguajmë me gabime të papranueshme”, ka thënë ajo.