Ministri i Shëndetësisë, Arben Taravari, njoftoi se pacientët e lënduar nga zjarri në Koçan janë në gjendje përgjithësisht stabile, ndërsa 20 pacientë janë në gjendje kritike dhe mund të kenë komplikime. Ai shtoi se në ditët në vijim pritet të ketë pacientë të rinj që do të paraqiten për trajtim mjekësor, pasi sic theksoi disa, fare nuk kishin kërkuar ndihmë mjekësore.
“Thirrje për të gjithë ata të cilët kanë qenë në rastin tragjik dhe nuk janë lajmëruar, i lusim që nëse kanë dhe nëse nuk kanë simptoma, të konsultohen me mjekët, së paku me mjekët amë dhe më pas të jemi të njoftuar”, tha Arben Taravari
Numri i deritanishëm i pacientëve gjithsej është 135. Ministri Taravari njoftoi se 84 pacientë janë duke u trajtuar në Klinikat në Shkup, 51 pacientë të tjerë janë duke u trajtuar jashtë vendit.
“Deri tash në klinikat e Shkupit ka 84 pacientë. Strategjinë e ndryshuam. Dje të gjithë pacientët prej Koçanit dhe Shtipit i morëm këtu pasi 51 pacientë tashmë janë jashtë vendit. Unë kisha dashur edhe njëherë të tregoj se në Turqi janë 9 pacientë, në Bullgari 14, në Greqi 5, në Serbi 17, në Hungari 2 dhe në Rumani 4. Sot shpresoj që shkon edhe një fluks i pacientëve, në Slloveni 4, në Kroaci 4, në Austri 6 dhe në Beograd edhe 12 pacientë”, deklaroi Taravari.
Drejtori i Fondit Shëndetësor, Sasho Klekovski, theksoi se sistemi shëndetësor i Maqedonisë me sukses e ka përfunduar fazën e parë të përkujdesjes ndaj të lënduarve.
“Patjetër duhet të tregojmë që faza e parë e kujdesit të pacientëve ka mbaruar. Të gjithë janë pranuar, asnjë nuk është lënë pas dore”, tha Sasho Klekovski.
Ministri i Shëndetësisë, Arben Taravari bëri të ditur se tashmë 15 mjekë nga vende të ndryshme të botës kanë arritur në Maqedoninë e Veriut.