Për ministrin e Jashtëm, Bujar Osmani miratimi i rezolutës nga Parlamenti Evropian për Maqedoninë e Veriut është një hap përpara drejt hapjes së negociatave me Bashkimin Evropian. Edhe pse dje në miratimin e rezolutës nuk e kaloi amendamentin për dënimin e retorikës provokuese të Bullgarisë, por vetëm dy amandamentet që kanë të bëjnë me diskriminim të bullgarëve në Maqedoninë e Veriut.
“Mendoj se nuk duhet të defokusohet rëndësia e rezolutës e cila qartë e thërret Bashkimin Evropian që të fillojë bisedimet me Maqedoninë e Veriut dhe e përforcon perspektivën evropiane të shtetit. Deputetët e Parlamentit Evropian vendosin mbi bazën e mendimeve dhe qëndrimeve të tyre. Në procesin e mbrëmshëm e shohim si një hap më para drejt mendimit të hapur dhe është koha që BE pa vonesa të fillojë negociatat”, tha ministri i Punëve të Jashtme, Bujar Osmani.
Ndërsa eurodeputeti bullgar Ilhan Quçuk, dje porosit se është me rëndësi që Maqedonia dhe Bullgaria të vazhdojnë me dialogun konstruktiv për të arritur një kompromis për Planin Aksionar.
“Shpresojmë se edhe Maqedonia e Veriut, edhe Bullgaria me anë të një dialogu konstruktiv do të arrijnë rezultate të qëndrueshme dhe do t’i zgjidhin mosmarrëveshjet e tyre. Duhet të kemi masa konkrete sa i takon zbatimit dhe kjo punë duhet të mbikëqyret me shumë vëmendje. Kjo është e nevojshme me qëllim që të jemi të sigurt se Konferenca e parë Ndërkombëtare do të mbahet sa më shpejt. Po, këtu duhet të kemi objektivitet dhe besim në procesin aderues. Duhet të kemi pasqyrë më të gjerë gjatë ndërtimit të besimit të përbashkët që të mund ta ndërtojmë ardhmërinë e përbashkët. Na duhen ura për bashkim, e jo mure për përçarje”, u shpreh Ilhan Quçuk – eurodeputet bullgar.
Në një debat të nxehtë dje Parlamenti Evropian miratoi rezolutën për Maqedoninë e Veriut, me të cilën përshëndeten përpjekjet e vendit në reformat për anëtarësim në BE dhe inkurajohen Shkupi dhe Sofja për të gjetur zgjidhje të përbashkët të pranueshme rreth kontestit për shkak të së cilit Maqedonia e Veriut nuk mund t’i fillojë negociatat me BE-në edhe krahas reformave të plotësuara.