“Open Ballkan” që “ndan” Maqedoninë dhe Kosovën, Osmani dhe Gërvalla me mendime të kundërta për iniciativën

Për Kosovën, iniciativa “Ballkan i Hapur”, ose iniciativa e Novi Sadit siç e quan qeveria kosovare, është ide e rrezikshme e që mund të përçojë mesazh të gabuar deri te Bashkimi Evropian. E përcjellja e këtij mesazhi është edhe më i rrezikshëm se sa vonesat që mund të ndodhin gjatë rrugëtimit drejtë BE-së, vlerëson ministria për Punë të Jashtme e Kosovës, Donika Gërvalla-Shvarc.

“Si Republikë e Kosovës iniciativën e Novi Sadit në ndërkohë të Mini shengenit, e që nga dje “Ballkani i hapur” e konsiderojmë të rrezikshme. E konsiderojmë të rrezikshme sepse sikur përçohet mesazhi sikur kemi alternativë ndaj rrugës tonë të përbashkët si rajon drejt BE-së”, tha Gëvalla – Shvarc.

Për ministrin e jashtëm të Maqedonisë, Bujar Osmani, iniciativa për bashkëpunim rajonal “Ballkan i hapur” është vlerë e shtuar për bashkëpunim. Shton se vendimi për të marrë pjesë ose jo në një iniciativë të tillë, duhet të merret mbi një analizë të detajuar dhe të mirë shpjeguar.

“Në rajon ka mbi 70 iniciativa, secila me kontributin e vet për të qenë vlerë e shtuar për të thelluar bashkëpunimin…Edhe kjo iniciativa e fundit unë e shoh si iniciativë në përpjekje për të qenë vlerë e shtuar në kuadër të thellimit të bashkëpunimit rajonal, pa tentuar që të neutralizojë efektin e iniciativave tjera rajonalë të cilat janë ekzistuese”, tha Osmani.

Megjithatë Gërvalla shtoi se Kosova është pjesë e një iniciative ku vlerësohet si partnere e barabartë me të gjitha palët.

“Ne kemi një proces të përbashkët rajonal, ku jemi të gjitha vendet e rajonit procesi quhet Proces i Berlinit. Aty kemi disa vite që përpiqemi të shtyjmë përpara marrëveshjet të cilat prekin të gjithë qytetarët tanë dhe në këtë iniciativë Republika e Kosovës është partner i barabartë me 5 shtetet e tjera të Ballkanit”, shtoi Gërvalla – Shvarc.

Po ndonëse dy ministrat kanë mendime të ndara për nismën “Ballkan i Hapur”, Osmani dhe Gërvalla siguruan për vazhdimin e bashkëpunimit të mëtejshëm të dy shteteve. E në shenjë mirënjohje për kontributin e dhënë, një rrugë e Çarshisë së Shkupit mori emrin e ri “Jusuf Gërvalla”, që është babai i Ministres Donika Gërvalla.