Gjithçka ishte gati që sot në orën 7 të mëngjesit të niste regjistrimi i popullsisë në terren, por kjo nuk ndodhi as në këtë qendër në Çair e askund në shtet!
Enti Shtetëror i Statistikave sqaron se nuk do të nisë me aktivitete në terren deri sa në Kuvend të gjendet zgjidhje për plotësim dhe ndryshim të ligjit.
“Deri te përfundimi i procedurës në Kuvend, që pritet të ndodh së shpejti, Enti Shtetëror i Statistikave nuk do të fillojë me aktivitetet në terren“, njoftuan nga Enti Shtetëror i Statistikave.
Derisa pritet zgjidhja në Kuvend, nga Enti thonë se edhe njëherë do të kontrollojë aktivitetet që janë ndërmarrë deri më tani. Po për opozitën shqiptare, me mos fillimin e regjistrimit në terren Enti shtetëror për është duke kryer vepër penale.
“Ky refuzim për të zbatuar ligjin është goditje e rëndë mbi parimin e sigurisë juridike, si koncept themelor i shtetit të së drejtës. I bëjmë thirrje Prokurorisë që urgjentisht t’i ndërmarrë masat e nevojshme për ruajtjen e shtetit të së drejtës, duke ngritur aktakuzë kundër Drejtorit dhe Zëvendësdrejtorit të Entit shtetëror për statistikë”, deklaruan nga koalicioni opozitar ASH-AAA.
Kryeministri Zoran Zaev nuk mendon kështu. Sipas tij, regjistrimi si proces ka nisur, jo në terren por në fazën përgatitore, andaj sipas tij askush nuk ka nevojë të mbajë ndonjë përgjegjësi.
“Regjistrimi si proces fillon më 1 prill, sot, dhe në pjesën e fillimit të regjistrimit ka fazë përgatitore për terren, organizimin e grupeve, vendosjen sistemore, drejtimin dhe uploadimin e të dhënave që i kanë dhe më pas nisin aktivitetet në terren. Unë besoj se Kuvendi, sot ose nesër, do të mund ta sjellë ligjin për regjistrim, ndryshimet dhe plotësimet e ligjit, që të mos ketë nevojë shtesë që të dilet në terren, pastaj të ndërpritet, e më pas ta vazhdojë nga 5 shtatori e më tej”, deklaroi Zaev.
Sipas kryeministrit, nëse deri në përfundimin e fazës përgatitore nuk gjendet zgjidhje në Kuvend dhe nisin faza e dytë e terrenit, atëherë çdo material regjistrues tashmë i plotësuar do të ruhet dhe do të jetë i vlefshëm për më vonë.