Sot mbushet një vjet që kur u regjistrua i inferkuati i parë me virusin korona, e që më pas u shpall gjendje pandemie. Virusi u gjet te një burrë 55-vjeçar nga provinca kineze Hubei. Që atëherë, numri i të infektuarve në botë tejkaloi 55 milionë, ndërsa më shumë se 1.300.000 persona ndërruan jetë si pasojë e Kovid-19. Sot, në Kinë, prej ku filloi gjithçka, regjistrohen vetëm disa raste në ditë, përderisa në SHBA në nivel ditor regjistrohen rreth 150.000 të infektuar, e në disa vende evropiane edhe mbi 40.000.
Nga OBSH paralajmërojnë vendet që sa më shpejtë të reagojnë kundër virusit, përndryshe pasojat do të jenë fatale dhe numri i viktimave do të rritet edhe më tepër.
“Ky është virus i rrezikshëm i cili mund të sulmojë çdo pjesë të trupit tonë. Vendet të cilët lejojnë që virusi të shpërndahet pa asnjë kontroll, janë duke luajtur me zjarrin”, tha Tedros Adhanom, drejtor gjeneral i OBSH-së.
Në fillim numri i të infektuarve rritej ngadal, por më pas ritmi u shpejtua, ndërsa virusi depërtoi jashtë kufijve kinez. Nga Kina, virusi kishte kaluar në SHBA-të. Shtetet e Bashkuara rastin e parë të korona virusit e konfirmuan më 22 janar. Pacienti sapo ishte kthyer nga Vuhani.
Global News 22 janar 2020
“Virusi i ri korona tani ka arritur në Shtetet e Bashkuara të Amerikës. Qendra për Parandalim dhe Kontroll të Sëmundjeve ka konfirmuar rastin e parë në Uashngton State. Pacienti i cili është në izolim së fundmi është kthyer nga Vuhani”.
Edhe pse Qendra Evropiane për kontrollin dhe parandalimin e sëmundjeve deklaroi se gjasat që virusi të hyjë në Evropë janë të vogla, në të vërtetë nuk ishte ashtu. Në Evropë rasti i parë me koronavirus u shënua në Francë. Të infektuarit virusin gjithashtu e kishin marrë nga Vuhani.
“Ministri francez i Shëndetësisë ka konfirmuar se janë regjistruar dy raste me koronavirus. Rasti parë është regjistruar të enjten. I infektuari është një burrë 48 vjeçar i cili është vendosur në izolim dhe i njëjti ishte kthyer nga Vuhani”, u shpreh Anelise Borges, korrespodente e Euronews.
E deri më 17 mars pothuajse të gjitha vendet në Evropë kishin të konfirmuar rastet e para me koronaviurs. Vendi ynë rastin e parë me koronavirus e shënoi më 26 shkurt. E infektuara e parë ishte një grua 50 vjeçare e cila ishte kthyer nga Italia.
“Erdhën rezultatet për pacienten e cila në orët e hershme të mëngjesit, rreth orës 3, është hospitalizuar në Klinikën për sëmundje infektive. Pacientja është pozitive në virusin Covid 19, pra është pacientja e parë në Shkup e diagnostikuar me këtë shkaktar. Më lejoni që të përsëris atë që po e themi vazhdimisht se nuk ka hapësirë për panik”, deklaroi Venko Filipçe – Ministër i Shëndetësisë.
Edhe pse më shumë se 38 milionë persona janë shëruar për një vit, virusi nuk po qetësohet dhe duket se kulmi po vjen. Për momentin, më së shumti të infektuar ka në SHBA, Indi, Brazil, Francë dhe Rusi. Disa Shkencëtarë dyshojnë se virusi nga lakuriqi ka kaluar në gjallesë tjetër, të cilën më vonë e ka konsumuar njeriu.