Nga viti i ri shtrenjtohet rryma, miliona euro në bazë ditore për kyçje në rrjetin evropian

Çmimi i energjisë elektrike është i garantuar deri në dhjetor. Nga 1 janari do të ketë shtrenjtim dhe për këtë duhet të jemi të vetëdijshëm, por askush nuk e di për sa do të rritet çmimi, tha për TV21 drejtori gjeneral i “Elektranave të Maqedonisë së Veriut”, Vasko Kovaçevski. Nuk do të ketë kufizime. Nuk ka vend për panik, sepse siç thotë, në TEC Manastir janë duke punuar dy blloqe, kurse mund të llogarisim edhe kapacitetin e TEC Negotinë.

“Në dhjetor duhet të bëjmë një plan, program prodhimi për vitin e ardhshëm. Do të orientohemi sipas shpenzimeve që janë rritur në raport me energjinë e shtuar të resurseve dhe repromaterialet . Do të formojmë një çmim të cilin do ta paraqesim në Qeveri. Qeveria do të na japë detyrim. Çmimin e energjisë elektrike e përcakton Komisioni Rregullator. Ne në këtë çmim marrim pjesë me 33%. Ne do të mundohemi të shkojmë me çmim më të ulët prodhimi, por duhet të jemi të vetëdijshëm se nuk do të shkojmë me çmimin e njëjtë si këtë vit. Do të ketë shtrenjtësim të rrymës, por as unë, e as dikush tjetër nuk mund të tregojë për sa përqindje do të rritet”, Kovaçevski.

Nga ana tjetër, drejtori gjeneral i MEPSO-s, Kushtrim Ramadani thotë se situata është alarmante, kompania çdo ditë përballet me mirëmbajtjen e qëndrueshmërisë. Në fillim të gushtit ai ka kërkuar takim joformal me KRRE-në ku ka tentuar t’i bindë kolegët e tij se na pret dimër i vështirë.

“Rreth 4.500 megavat/orë është dallimi mes prodhimtarisë dhe konsumimit në nivel ditor, do të thotë se na mungon prodhimtari, na mungon energji në rrjet. Bëhet fjalë për rreth një milion euro energji elektrike në ditë, sipas çmimeve aktuale në bursat evropiane. Ne, për shkak se nuk mundemi të prodhojmë aq se sa shpenzojmë, tërheqim nga rrjeti evropian, kjo do të thotë se disbalancin tonë në rrjet e transferojmë në rrjetin evropian, gjë që nuk do të guxonim ta bënim”, tha Ramadani.

Çmimet e energjisë elektrike në Evropë rriten në mënyrë drastike, ndërsa hidroakumulimet tona janë pothuajse të zbrazëta, shpjegon Ramadani. Rezervat e ujit janë të rëndësishme për mirëmbajtjen e nivelit të ujit në akumulimet, për shkak se në atë mënyrë mirëmbahet voltazhi i sistemit. TEC Manastir punon me vetëm një bllok për të cilin duhet të sigurohet qymyr, ndërsa kjo realizohet me vështirësi. Qymyr duhet të sigurohet edhe për TEC Osllomej, TEC Negotinë që punon me mazut, po ashtu ka problem që të kyçet me kapacitet të plotë. Për momentin mundemi të prodhojmë rreth gjysmën e energjisë elektrike që e shpenzojmë çdo ditë, ndërsa pjesën tjetër duhet ta importojmë.