Nga fundi erdhi në majë! Mposhti kancerin, lindi fëmijën e tretë, tani është biznesmene e suksesshme

Natalija Burgieva nga një menaxhere e suksesshme financiare në disa korporata, para gjashtë viteve hyri në një periudhë të vështirë. Kur nisi të përballej me një problem të madh shëndetësor, kancer të mitrës, ajo u nda nga bashkëshorti dhe mbeti nënë e vetme dhe e papunë. Duhej vetë të gjente mënyrë se si t’i përballojë të gjitha sfidat që u paraqitën në jetën e saj.  

“Pas dy-tre përpjekjeve me mjekësi konvencionale për t’i tejkaluar ato sfida dhe duke shpenzuar shumë para, pasi në Maqedoni kushton shumë të sigurohen shërbimet bazë shëndetësore, doli se sëmundja nuk është tërhequr. U vendosa ta edukoj veten se si mund t’i ndihmoj vetvetes me ndonjë mënyrë alternative dhe doli se duhej të ndryshoja mënyrën e të ushqyerit, gjegjësisht të filloj me një dietë. Kështu kalova nga ushqimi konvencional në ushqim të prodhuar në mënyrë organike, gjë që ndikoi ndjeshëm mbi shëndetin tim”, tha Natalija Burgieva, pronare e një kompanie për plehra organike.

Pas disa kontrolleve, shëndeti i saj është përmirësuar dukshëm, prandaj ka vendosur t’u ndihmojë njerëzve që përballen me problemin e njëjtë shëndetësor. Por, në ndërkohë shpenzoi të gjitha kursimet dhe duhej të mendonte se si të fitojë para për fëmijët e saj.

“Fëmijët e mi dhe unë mbetëm në një situatë të palakmueshme financiare. E njëjta ndodhi edhe me çështjen e banimit dhe më duhej të mendoja se si ta ndihmoja veten dhe mjedisin. Kishim ndihmë nga disa organizata humanitare që na jepnin ushqim dhe gjëra të tjera, por ai ushqim përbëhej nga sallame, salsiçe, pashteta, diçka që nuk ishte pjesë e dietës sime. Por, si të kultivohet ushqim në një hapësirë ​​të vogël? Jam nga Aerodromi, nga xhungla urbane e Shkupit. Fillova të mësoj disa parime nga Holanda, sepse ajo njihet për kopshtarinë urbane”, shtoi Burgieva.

Siç thotë, atje përdoren bio-mbetje dhe në vend që të hidhen dhe të ndotin, prej tyre mund të bëhet diçka e dobishme. Mund të sigurohen të ardhura për nënat në rrezik social. Natalija, si një sipërmarrëse mendonte se kjo zgjidhje mund të zbatohet në një shkallë më të lartë – të krijojë vende pune për nënat e vetme, të ndikojë mbi ndryshimet klimatike dhe njerëzit të kujdesen për mjedisin. Gjithashtu mund të reduktohet kostoja të cilën e bën Qyteti i Shkupit prej mbi 8 milionë eurove për transportin e mbeturinave nga “Drislla”. Natalija ka aplikuar në konkursin е „Arno-s” për ide të gjelbra në vitin 2016 dhe ka fituar në nivel kombëtar. Ajo mori fonde bazë për ta regjistruar biznesin e saj. Me ndihmën e Agjencisë për Punësim, ajo startoi një biznes i cili ndihmon që sot të trajtohen mbi 6 tonë mbetje bio në ditë. E sa i takon gjendjes së saj shëndetësore, ajo ndihet mirë. Në botë ka sjellë fëmijën e tretë, pas luftës me sëmundjen e mitrës.