Në prag të regjistrimit rriten rastet me Covid-19! “Nuk mendohet që të shtyhet regjistrimi i popullsisë”

Ndonëse ka rritje të numrit të të infektuarve me koronavirus, tani për tani komisioni për sëmundje ngjitëse nuk është duke menduar për shtyrje të regjistrimit të popullsisë.

 “Tash për tash jo. Duam që ta zbusim këtë trend të numrit të rritur të pacientëve të hospitalizuar, andaj shoh, masa të reja, propozimet e tjera, me vëmendje e ndjekim gjendjen. Tani për tani përveç kësaj nuk rekomandojmë asgjë tjetër”, theksoi Filipçe.

Drejtori i Entit të Statistikave, Apostol Simovski, ditë më parë pohoi se regjistrimi mund të ndërpritet, nëse Komisioni për Sëmundje ngjitëse e kërkon një gjë të tillë.

 “Nëse situata bëhet e tillë që zbatimi i regjistrimit të mos jetë i sigurt dhe Komisioni rekomandon shtyrje, ne absolutisht do ta respektojmë atë. Nuk do të lejojmë askush të vihet në rrezik dhe të jemi shkak për përhapje të virusit”, deklaroi Apostoll Simovski – Drejtor i Entit Shtetëror për Statistikë.

Tani mbetet të shihet nëse me miratimin e orës policore, do të ketë zbutje të gjendjes ose jo. Me shumë gjasa kjo do të jetë vendimtare për regjistrimin e popullsisë në vend. Në Maqedoninë e Veriut i njëjti do të fillojë më 1 prill, ndërsa tashmë 8 ditë ka nisur vetëregjistrimi i diasporës përmes aplikacionit online.

Gjatë qëndrimit në Romë, ministri për punë të Jashtme Bujar Osmani ka takuar sot mërgimtarë dhe përfaqësues të shoqatave në Itali, të cilët siç shkruan, i ka ftuar në mobilizim aktiv dhe që bashkërisht të përcjellin informacionin deri te qytetarët tanë jashtë vendit për rëndësinë e regjistrimit.

Deri më tani janë regjistruar rreth 40 mijë mërgimtarë.