Ndryshimi i Kodit Penal, Todoroviq tashmë nuk është në paraburgim shtëpiak!

Ish-kryetari i Komunës Qendër të Shkupit, Vlladimir Todoroviq, ishte i pari që i ndjeu përfitimet që sjellin ndryshimet e reja në Kodin Penal, publikon “Prizma”. Ai në qershor në hetimin “Feniks” ishte i dyshuar se si zyrtar ka keqpërdorur pozitën dhe autoritetin zyrtar për projektin “Shkupi 2014”, përcjell TV21. Prej atëherë e deri të premten e kaluar, ai ishte në arrest shtëpiak. Pas propozimit të prokurorit, gjykata e anuloi këtë kufizim të lirisë së tij.

Shkak për këtë është se vepra për të cilën ai ishte i dyshuar, sipas këtyre ndryshimeve që hynë në fuqi më 15 shtator, vjetërson këtë vit. Hetimi ndaj tij ende nuk është ndërprerë, por, sipas ndryshimeve të fundit ligjore, është e sigurt që kjo do të ndodhë, pasi veprimet i ka kryer deri në vitin 2013, kështu që në vend në vitin 2043, vepra vjetërson plotësisht këtë vit./tv21.tv