Monstra, avokatët do të ankohen për vendimin! Familjarët paralajmërojnë protesta

Familjarët dhe avokatët e të akuzuarve në rastin “Monstra” shprehen të zhgënjyer nga dënimet gjykatës penale për të akuzuarit për vrasjen e pesëfishtë. Avokatët Alispahiq dhe Raufi njoftuan ankesa kundër dënimeve dhe për këtë do t’i referohen aktvendimit të Gjykatës së Lartë, që i liroi të pandehurit.

 “Të rikujtoj se në fjalët përfundimtare të prokurorisë, pikërisht këto dënime I kërkuan. Për të akuzuarin Haki Aziri 9- 10 vite, për Fejzi Aziri 15 vite, dhe 3 vendime për burg të përjetshëm, kjo tregon se që nga aktvendimit e deri te paraburgimi kanë  marrëveshje”, tha Asmir Alispahiq – avokat i të dënuarve.

 “Mendoj se edhe tash u konstatua që kjo gjykatë është ende e paaftë dhe nuk sundon drejtësia tek ne në Maqedoni. Si e kam thënë atëherë kur ishte vendimi i parë që nuk ka një sundim të drejtësisë, tash mund të them se edhe më pak kemi sundim të drejtësisë”, potencoi Naser Raufi – avokat i të dënuarve.

Familjari Bedri Ajdari, tha se rigjykimi duhej të gjente porositësit, organizatorët, motivin dhe vrasësit e vërtetë, por nuk e bëri, prandaj kjo gjykatë nuk ka kredibiltet. Ai tha se do të organizojnë protesta në kërkim të drejtësisë.

 “Paralajmëroj protesta dhe e ftoj kreun e shtetit të cilët kanë qenë nëpër protesta në revolucionin laraman, të cilëve ne u kemi ndihmuar për ta rrëzuar sistemin, e jo për ta ndërruar garniturën për të ardhur një garniturë tjetër, por për ti reformuar institucionet gjë që nuk u bë dhe kjo si rezultat i asaj sot u shpall në këtë gjykatë e cila është e kriminalizuar dhe e ndikuar nga njerëz të partive të ndrydhmë apo institucioneve të ndryshme”, deklaroi Bedri Ajdari – familjar i të dënuarve.

Gjykata Supreme në vitin 2017  i shfuqizoi dënimet për rastin Monstra  dhe e rifilloi gjykimin, për shkak të rrethanave të reja dhe bombave që LSDM i dërgoi në PSP,  prej të cilave pritej të zbardhej rasti, por kjo nuk ndodhi. Rigjykimi i Monstrës filloi në vitin 2018. Ndërkohë Gjykata Penale në vitin 2014 dënoi gjashtë persona me burgim të përjetshëm, përfshirë Sami Lutën, për të cilin akuza tani është tërhequr dhe ai është i lirë.