“Minatorët meritojnë më shumë”, 39.324 denarë paga mesatare në miniera

Neto paga mesatare për periudhën janar – qershor 2021, në sektorin e minierës dhe nxjerrjes së gurit është 39 324 denarë dhe shënon rritje prej 6,3% në raport me periudhën e njëjtë të vitit 2020. Kjo pagë është për 36,8% më e lartë në krahasim me neto pagën mesatare në nivel shtetërorë. Por, me rastin e Ditës së minatorëve, zv.kryeministri Fatmir Bytyqi, porositi se si profesion me rrezik të lartë, minatorët meritojnë më shumë.

“Minatorët por edhe të gjithë qytetarët tjerë meritojnë më shumë. Meritojnë pagë dinjitoze dhe kushte dinjitoze për punë. Andaj e shfrytëzoj këtë mundësi që të apeloj deri te të gjithë në këtë sektor që të respektojnë të punësuarit e tyre, për shkak se të punësuarit janë hallka kryesore në çdo kompani. Dua të theksoj se sektori i minierave dhe nxjerrjes së gurit po shënon rritje serioze në eksport prej 24,8% në gjashtë muajt e parë të vitit 2021, në raport me periudhën e njëjtë vitin e kaluar, përkatësisht janë eksportuar produkte në vlerë prej rreth 100 milion euro”, tha Bytyqi.

Edhe pse bëhet fjalë për profesion me rrezik të madh, vdekshmëria nuk është më e lartë sesa në veprimtaritë tjera në vitet e fundit – thotë Nikollajço Nikollov, ish drejtor i minierës “Buçim”. Por, edhe ky sektor si sektorët tjerë po përballet me mungesë të punëtorëve. Mosha mesatare në Buçim, siç thotë ai, ka qenë 48 vjet, ndërsa me hapjen e repartit të ri ku janë punësuar 60 të punësuar deri në moshën 30 vjeçare, është përmirësuar struktura e moshës.

“Për këto dy vjet, vite kritike dhe me krizë, sektori i minierave punon mirë, por nuk është vërejtur largim nga puna i punëtorëve. Paga mesatare në sektorin e minierave është mbi 560 euro neto. Kjo për këtë sektor ndoshta nuk është shumë, megjithatë për kushtet tona në RMV është mesatare e mirë, posaçërisht nëse merret parasysh se paguhet në kohë me gjithë kontributet”, vlerëson Nikollov.

Në prodhimin e përgjithshëm industrial, minierat marrin pjesë me 10%. Në BPV me 1%. Në eksport vetëm nga metalet me ngjyrë realizohen 200 milion euro në vjet, tani çmimet janë më të larta kështu që edhe shuma do të jetë më e lartë.