Sa para janë larë nga abuzimet në prokurimin e mazutit për TEC Negotinë, që i ka shkaktuar buxhetit mbi 167 milionë euro dëm? Sa nga kulaçi kanë ndarë 13 të dyshuarit, të cilët tani po hetohen nga prokuroria? A do të vërtetohet se si dhe ku janë bërë marrëveshjet sekrete për ndarjen e tortës, a do të zbulohet gjurma e parave nga abuzimet dhe ku janë paratë?!
Të gjitha këtyre pyetjeve duhet t’u përgjigjet hetimi i madh i prokurorisë për tenderët milionësh për mazutin për TEC Negotinë.
Përfshihen ish-drejtori i EMV-së, Vasko Kovaçevski, i cili është në arrati, pronarët e RKM-së, të themeluar nga Ratko Kapushevski dhe pronari i “Pucko Petrol”, Asmir Jahoski, djali i deputetit të BDI-së, Ismail Jahoski. Ratko Kapushevski, Adrian Muça dhe Erxhan Sullkoski janë në paraburgim, ndërsa Jahoski aktualisht është në arrest shtëpiak, i cili është ankimuar.
Çështja u hap me iniciativën e ish-Komisionit Kundër Korrupsionit në fund të vitit 2023. Hetimi nga anëtarët e antikorrupsionit zbuloi shumë dyshime për abuzime.
“Janë konstatuar gjendje që sugjerojnë për dyshime për tregti përmes informacioneve të brendshme në tregun energjetik. Po ashtu u konstatuan dyshime për fshehje tatimore dhe erozion i të ashtuquajturit tatim i solidaritetit si dhe dyshime për bashkim monopol dhe armiq në tregun e mazutit në shtet”, tha Goran Tërpenovski – ish-anëtar i KPSHK.
Por sipas informacioneve të TV21, tek Erxhan Sullkovski është gjetur një shumë e konsiderueshme parash – jo zyrtarisht 3 milionë euro në valixhe. Është konfiskuar edhe vetura e tij luksoze. Ndërkaq në shtëpinë dhe në zyrat e “Pucko Petrol” dhe familjes Jahoski janë gjetur armë, para, pajisje.
Prokuroria zbuloi pjesë të detajeve për hetimin për RKM, për Kapushevskin dhe Jahoskin. Për t’i fshehur paratë nga bizneset e dyshimta me mazutin për TEC Negotinë, në periudhën nga dhjetori 2021 deri në prill 2023 të dyshuarit i kanë lëshuar në qarkullim, i kanë ndryshuar dhe ia kanë transferuar dikujt tjetër me qëllim që të maskohet origjina. Kanë bërë transferime dhe kanë nxjerrë kesh, i kanë bërë huamarrje “vetes” prej 1,2 milionë eurove.
“Me një pjesë të mjeteve kanë blerë dy automjete Mercedes Benz, një pjesë e kanë transferuar në xhirollogaritë e tyre në banka të ndryshme, dhe më pas i kanë tërhequr në kesh, në dy raste gjoja për punë të kryera janë transferuar mjete në shumë prej 72.000.000,00 denarëve. I dyshuari, në dijeni të origjinës së tyre, mjetet e marra në këtë mënyrë ia ka transferuar personit të tij juridik në bazë të “huamarrje” për të fshehur vendndodhjen e tyre”, thonë nga PPTH.
Por çfarë abuzimesh duhet të tregojë hetimi?! Mënyra e ruajtjes, mënyra e dorëzimit dhe prova për abuzime në prokurimin e mazutit. Parregullsi në prokurim. Si u formua kostoja e lartë e transportit të mazutit. Dërgesat në mesnatë në TEC Negotinë, më së shpeshti në ditët kur çmimi i mazutit rritet nga Komisioni Rregullator ndërsa derivati dorëzohej pas mesnate me çmim më të lartë. Si është marrë garancia bankare për RKM për thirrjen publike? Cilësia e mazutit të importuar – a është kancerogjen dhe i dëmshëm për mjedisin dhe shëndetin e njerëzve? A dërgonin cisternat vetëm mazut apo shtohej edhe ujë? Sa u dorëzua, sa u pagua dhe me çfarë çmimesh? Dhe më e rëndësishmja – ku përfunduan mbi 167 milionë euro dhe kush do t’i kthejë paratë?!