Microsoft ka prezantuar një seri përmirësimesh të bazuara në inteligjencën artificiale për Windows 11, përfshirë aktivizimin me zë në PC-të me Windows 11 dhe funksione të tjera eksperimentale të AI-së (Inteligjencës Artificiale).
Përditësimet e asistentit Copilot synojnë të thjeshtojnë ndërveprimin e përdoruesit dhe të automatizojnë detyrat e përditshme. Tani, përdoruesit mund të aktivizojnë Copilot me komandën zanore “Hey Copilot” në çdo PC me Windows 11 përmes një funksioni të ri regjistrimi.
Një funksion tjetër, Copilot Vision, i cili mund të analizojë atë që shfaqet në ekran dhe t’u përgjigjet pyetjeve, do të lançohet në të gjitha tregjet ku Copilot është i disponueshëm.
Microsoft njoftoi gjithashtu se, së bashku me Copilot Labs, do të ofrohen edhe më shumë funksione eksperimentale të AI-së dhe agjentë për përdoruesit e Windows Insiders.
Ndër përmirësimet është edhe një zgjerim eksperimental i Copilot Actions jashtë shfletuesit, duke mundësuar veprime të kufizuara mbi skedarët lokalë në Windows për Windows Insiders. Copilot Action për uebin, i prezantuar më parë në maj, lejon asistentin AI të trajtojë detyra të ndryshme, si prenotimi i restoranteve apo porositja e ushqimeve.
Yusuf Mehdi, drejtor i marketingut për produktet e konsumit, e përshkroi këtë veprim si një ndryshim të rëndësishëm:
“Ne besojmë se jemi në prag të një evolucioni të ri, ku inteligjenca artificiale nuk kufizohet vetëm te chatbot-et, por integrohet pa probleme në miliona përvoja me të cilat njerëzit angazhohen çdo ditë.”