Eksportet po rriten më shpejt se importet, ndërsa deficiti tregtar po ulet. Kështu deklaroi kryeministri Hristijan Mickoski, duke iu referuar të dhënave për shtatë muajt e parë të vitit, përcjell TV21. Sipas tij, rezultatet e korrikut kanë qenë mbi pritshmëritë, ndërsa rritja e importeve lidhet kryesisht me çmimet e larta të naftës. Mickoski vlerëson se stabilizimi i tyre do ta ulte edhe më tej deficitin tregtar.
“Për herë të parë, ndoshta pas një kohe të gjatë, eksporti ynë është më i madh se importi. Kjo do të thotë se eksportet po rriten më shpejt se importet dhe, në këtë mënyrë, deficiti tregtar po ulet. Në shtatë muajt e parë të vitit, kjo është veçanërisht e theksuar në korrik, i cili në fakt është muaji i parë i tremujorit të tretë, sepse tremujori i dytë tashmë ka përfunduar. Tani jemi të përqendruar në tremujorin e tretë, i cili përfundon këtë shtator. Të dhënat e para për muajin e parë të tremujorit të tretë, që është korriku, janë vërtet mbi pritshmëritë tona, veçanërisht sa i përket eksporteve, të cilat, e përsëris, po rriten më shpejt se importet. Ndërsa importet po rriten për shkak të çmimeve të larta të naftës dhe produkteve të saj. Nëse ajo pjesë e tregut do të stabilizohej, atëherë ajo diferencë do të ishte edhe më e madhe dhe mbulimi do të ishte edhe më i madh. Kjo do të thotë se deficiti tregtar do të ishte edhe më i vogël, gjë që për mua është me të vërtetë një tregues tjetër se më në fund mund të flasim për një situatë të konsoliduar. Duke marrë parasysh se ku ishim 25-26 muaj më parë”, tha Mickoski.