Maqedonia mes vendeve më të varfra në Evropë! Pushteti i përgatitur për skenarë të ndryshëm!

Maqedonia është mes vendeve më të varfra në Evropë. Sipas të dhënave të “Eurostat-it”, vendi ynë e zë vendin e tretë sipas shkallës së varfërisë. Pas saj janë vetëm Shqipëria dhe Bosnja e Hercegovina. Analiza e “Eurostat-it” tregon se në vendin tonë qytetarët blejnë ushqim më të lirë, pije pa alkool dhe duhan nga të gjitha 27 vendet në Evropë. Për nevojat themelore, plus për cigare, qytetarit të Maqedonisë i duhen 61% e mjeteve të mesatares evropiane. Se standardi i jetesës në vend është i ulët, së fundmi në një paraqitje për TV21, pohoi edhe ish-zëvendësguvernatorja e Bankës Popullore, Maja Kadievska-Vojnoviq.

“Maqedonia sipas standardit të jetesës, që matet përmes BPV-së për kokë banori dhe sipas fuqisë blerëse, është rreth 36% nga mesatarja evropiane, që bën të jetë vend me standard të ulët të jetesës. Të gjithë indikatorët sa i takon besimit tregojnë se ka besueshmëri të ulët të konsumatorëve në sektorin e shërbimit dhe në sektorin e shitjes me pakicë. E gjithë kjo nuk jep shpresë se edhe në tremujorin e fundit do të kemi ndonjë përmirësim, por përkundrazi”, tha  Maja Kadievska-Vojnoviq – ish-zëvendësguvernatore e BPRM-së.

Jemi të përgatitur për skenarë të ndryshëm me zhvillim të krizës, por nuk presim revidim të arkës shtetërore para gjysmë-vjetorit të parë të vitit 2021, theksoi zëvendësministri i Financave, Dimitar Kovaçevski.

“Qëllimi ynë kryesor është që në periudhë afatmesme ta përshpejtojmë rritjen ekonomike nga 2 në 2.5% siç ishte në dekadën e fundit, 4 deri në 5% e rritjes mesatare vjetore të BPV-së në pesë vitet e ardhshme”, tha Dimitar Kovaçevski – zëvendësministër i Financave.

Vojnoviq edhe një herë rikujtoi për problemet me të cilat përballet vendi ynë. Ajo thotë se një nga problemet më të mëdha janë ekonomia gri, normat e ulëta të taksave kundrejt shpenzimeve për pensionet dhe nevojat e tjera sociale, të cilat, sipas saj, janë në nivel shumë të lartë.

“Të gjitha ato huamarrje të reja krijojnë pagesa me normë interesi. Vetëm në vitin 2021 me Buxhetin e ri pagesat me normë interesi janë 150 milionë euro. 150 milionë euro duhet të paguajmë vetëm për normat interesi, me çka reduktohet hapësira ​​diskrecionare për ekonominë vendase”, shtoi Vojanoviq.

Po ballafaqohemi me një vit plot me sfida, por jemi të përgatitur për skenarë të ndryshëm, porosisin nga pushteti. Ndryshe, sipas statistikave të fundit, vendet me BPV më të lartë në Evropë janë Luksemburgu dhe Irlanda, Zvicra, Norvegjia, Danimarka dhe Holanda.