Kufinjtë e Maqedonisë së Veriut kundrejtë shteteve fqinje duhet të hapen më 1 qershor. Për shtetasit fqinj që hyjnë në vendin tonë nuk do të ketë karantinë 14 ditore, dhe nuk duhet të jenë të testuar për Covid-19. Këtë propozim e dhanë ekspertët e Komisionit për sëmundje infektive në mbledhjen e sotme. Drejtori i Qendrës për Shëndet publik Arben Ziberi thotë se është koha që në koordinim me shtetet që na rrethojnë edhe ne t’i hapim kufinjtë, sipas tij në kufi duhet të tregojnë testimin PCR qytetarët që vijnë nga vendet anëtare të Bashkimit Evropian.
“Kur do të hapen kufijtë, po flas për këto shtete fqinje. Pra nëse hapen me 1 qershor nuk do të ketë më izolim? Jo, nuk do të ketë izolim, apo karantin për personat që do të jenë nga Shqipëria apo nga shtetet fqinje. Personat që vijnë nga shtetet e Unionit Evropian ngel të shohim se si do të rrjedhë më andej, për momentin vlen se qytetarët që udhëtojnë nga vendet evropiane u nevojitet për momentin që të hyjnë në RMV test i cili nuk është më i vjetër se 72 orë dhe ata persona nuk shkojnë në karantinë shtetërore por në vetëizolim apo në shtëpitë e tyre”, tha drejtori i QSHP Arben Ziberi.
Kur të hapen kufinjtë do të hiqet edhe kufizimi i lëvizjes së qytetarëve. Ora policore do të vlejë deri me 1 qershor deri atëherë kur Komisioni për Sëmundje Infektive vlerëson se duhet të hapen kufinjtë tokësorë.
“Propozimi i komisionit është që në momentin kur do t’i hapim kufinjtë të hiqet ora policore, sepse nuk ka logjikë nuk ka vlerë. Për shkak se do të lejojmë udhëtimin e lirë të qytetarëve. Ora policore nuk ka lidhje me gjendjen e jashtëzakonshme”, tha drejtori i QSHP Arben Ziberi.
Ndryshe kryeministri Edi Rama ka paralajmëruar se Shqipëria do të hapë vendkalimet kufitare për shtetet fqinje me 1 qershor, njëjtë do të veprojë edhe Mali i Zi. Fqiu jugor Greqia pritet t’i hapë kufinjtë me 15 qershor, e mendim të ngjashëm ndan edhe Kosova. Serbia ia ka hapur dyert Maqedonisë së Veriut dhe nuk kërkon test ose karantinë.
Kufinjtë tokësorë u mbyllën që nga 16 marsi, kjo për shkak të masave për parandalim të virusit korona.