Mançevski,Carovska dhe Zabërçanec në vetizolim, kanë pasur kontakte me Zekirin

Ministri i Shoqërisë Informatike dhe Administratës Damjan Mançevski, zv/krzeministrja për çështje ekonomike Milla Carovska dhe këshilltari për marrëdhënie me publikun i kryetarit të Qeverisë, Marjan Zabërçanec janë në izolim shtëpiak për shkak se kanë pasur kontakt me nënkryetarin e LSDM-së Muhamed Zekiri.

Mançevski dhe Zabërçanec në profilet e tyre në Fejsbuk informuan se me rekomandim të epidemiologëve do të jenë në vetizolim.

“Sipas rekomandimeve të epidemiologëve, për shkak të takimit me shokun dhe kolegun tim Muhamed Zekiri, në nëntë ditët e ardhshme do të jem në vetizolim. Në takim ishin zbatuar protokolle shëndetësore, por megjithatë rekomandimet e ekspertëve shëndetësorë janë më të rëndësishme dhe duhet t’i respektojmë. Mukit dhe familjes së tij i dëshiroj shërim të shpejtë. Të gjithë të tjerëve Ju dëshiroj shëndet të mirë”, shkroi ministri Mançevski.

Edhe Zabërçanec informoi se është në vetizolim shtëpiak për shkak të asaj se të enjten pasdite kishte qenë në mbledhje me Zekirin. Në takim, siç shkruan, ishin zbatuar rekomandimet për distancë fizike, bartja e maskës dhe përdorimi i mjetit për dezinfektim para dhe pas takimit.

“Gjithsesi, për shkak të shmangies të rrezikut edhe më të vogël, do ta zbatoj vetizolimin e rekomanduar. Nuk kam kurrfarë simptoma, ndërsa do të testohem gjatë javës. Muhamedit dhe familjes së tij iu dëshiroj shërim të shpejtë. Të gjithë t’i respektojmë masat dhe rekomandimet e epidemiologëve dhe në këtë mënyrë të mbrojmë vetveten dhe të gjithë rreth nesh”, shkroi Zabërçanec në Fejsbuk.

Nënkryetari dhe deputeti i LSDM-së, Muhamed Zekiri dje bëri të ditur se ai dhe familja e tij janë pozitivë në KOVID-19 dhe iu bëri thirrje të gjithëve që t’i respektojnë rekomandimet.